राष्ट्रपति निर्वाचनको प्रक्रियाअन्तर्गत आज मतदाता विरुद्ध उजुरी दिन सकिने

काठमाडौं । राष्ट्रपति निर्वाचन प्रक्रियाअन्तर्गत आज (बिहिबार) मतदाता नामावलीमा नाम समावेश भएका व्यक्तिमाथि उजुरी दिन सकिने निर्वाचन आयोगले जनाएको छ ।

निर्वाचन कार्यतालिका अनुसार शुक्रबार अन्तिम मतदाता नामावली प्रकाशन गर्ने र फागुन १३ गते शनिबार उम्मेदवारी दर्ता गर्ने कार्यतालिका रहेको छ । राष्ट्रपति निर्वाचनका लागि सरकारले यहि फागुन २५ गतेको मिति तय गरेको छ । मतदान बिहान १० बजेदेखि ३ बजेसम्म हुनेछ । अपराह्न ४ बजेदेखि मतगणना प्रारम्भ गरी सोही दिन ७ बजेभित्रमा नतिजा सार्वजनिक गर्ने आयोगको तयारी छ ।

तर राष्ट्रपति कसलाई बनाउने र कुन दलले कसलाई उम्मेदवार बनाउने भन्ने बिषयमा भने दलहरुको दौडधुप चलिरहेको छ ।