काठमाडौं । अस्ट्रेलियाको नर्दन टेरिटोरीमा जारी टप एण्ड टी-२० सिरिजमा नेपालले लगातार दोस्रो पराजय व्यहोरेको छ ।
शनिबार भएको खेलमा नेपाल बंगलादेश ‘ए’सँग २९ रनले पराजित भयो । १८४ रनको लक्ष्य पछ्याउँदै मैदानमा उत्रिएको नेपालले निर्धारित २० ओभरमा ७ विकेट गुमाउँदै १५४ रन मात्र बनाउन सक्यो । नेपालका कुशल मल्लले उत्कृष्ट प्रदर्शन गर्दै ४७ बलमा अविजित ५९ रनको अर्धशतक प्रहार गरे पनि टोलीलाई जित दिलाउन भने सकेनन् ।
बलिङतर्फ बंगलादेशका रकिबुल हसनले ३ विकेट लिए भने सेफ हसन, रिपोन मन्डल र मृत्युन्जय चौधरीले समान १–१ विकेट हात पारे । यसअघि टस जितेर पहिले ब्याटिङ गरेको बंगलादेशले २० ओभरमा ६ विकेटको क्षतिमा १८३ रन जोडेको थियो । टोलीका ओपनर जिशाद आलमले आक्रामक खेल प्रस्तुत गर्दै ७१ रन बनाए भने अफिफ होसेन ४८ रनमा अविजित रहे ।
नेपालका लागि रिजन ढकालले २ विकेट लिन सफल भए भने नन्दन यादव, करण केसी र सन्दीप लामिछानेले एक–एक विकेट लिए । यसअघि शुक्रबार भएको उद्घाटन खेलमा नेपाल एनटी स्ट्राइकसँग पराजित भएको थियो ।
अब नेपालले आगामी खेलमा मेलबर्न स्टार्स, होबार्ट हरिकेन्स, मेलबर्न रेनेगेड्स र पाकिस्तान शाहीन्ससँग प्रतिस्पर्धा गर्नेछ ।
प्रतिक्रिया