सामान्य घट्यो शेयर बजार, १९ अर्ब बढीको कारोबार

काठमाडौं । नेपाल स्टक एक्सचेन्ज (नेप्से) परिसूचकमा सोमबार पनि गिरावट देखिएको छ।

बजार सूचक २.०७ अंकले घट्दै २९६२ अंकमा झरेको छ। दिनको अन्तिम १५ मिनेटमा भएको भारित औसत मूल्य समायोजनअघि बजार १२ अंकले उकालो लागेको भए पनि समायोजनपछि सूचक पुनः ओरालो लागेको हो। यसअघि आइतबार पनि नेप्से १८.४४ अंकले घटेको थियो।

बजार सोमबार खुल्नासाथ ओरालो लाग्न थालेको थियो र मध्यदिउँसो १२:३८ बजे सम्म आइपुग्दा सूचक २९१८ अंकसम्म झरेको थियो, जुन दिनको सबैभन्दा न्यून विन्दु रह्यो। यद्यपि त्यसपछि केही सुधार देखिए पनि अन्तिममा नेप्से रातो मै सीमित रह्यो। कारोबार रकममा पनि गिरावट आएको छ। अघिल्लो दिन २६ अर्ब ५७ करोड रुपैयाँ बराबरको कारोबार भएको थियो भने सोमबार त्यो घटेर १९ अर्ब ३६ करोड रुपैयाँमा सीमित भयो।

यसबिच, केही समूहले भने हरियाली देखाएका छन्। व्यापार समूह ३.२४ प्रतिशत र विकास बैंक समूह ३.०४ प्रतिशतले वृद्धि भए। फाइनान्स समूह २.७५ प्रतिशतले तथा उत्पादन तथा प्रशोधन समूह १.७१ प्रतिशतले बढेका छन्।

लगातारको उतारचढावबीच लगानीकर्ताहरू अझै पनि बजारको स्थायित्वको प्रतीक्षामा देखिएका छन्।