जाजरकोटमा ढुङ्गा लागेर टहरामा सुतिरहेका दिदी- बहिनीको मृत्यु

जाजरकोट । जिल्लाको कुशे गाउँपालिका–३, तर्पेनामा ढुङ्गा खसेर एकै घरका दुई किशोरीको ज्यान गएको छ।

बिहीबार राति करिब ९ बजेको समयमा अस्थायी टहरामा सुतिरहेकी १८ वर्षीया शर्मिला बुढा र १४ वर्षीया चमेली बुढाको घटनास्थलमै मृत्यु भएको हो। वडाध्यक्ष वीरबहादुर बुढाका अनुसार निरन्तर वर्षाका कारण पहिरोको जोखिम बढेका कारण ढुङ्गा खस्ने घटना भएको हो। मृतक दुवै जना नरबहादुर बुढाकी छोरी हुन्।

उनीहरू बाख्राको रेखदेख गर्नका लागि भूकम्पपीडितका लागि बनाइएको अस्थायी टहरामा बस्दै आएका थिए। वर्षाले कमजोर बनाएको भूभागबाट अचानक ढुङ्गा खसेर टहरा भत्किँदा उनीहरूलाई गम्भीर चोट लागेको थियो। वडाध्यक्ष बुढाका अनुसार ढुङ्गा लागेपछि उनीहरूको घटनास्थलमै मृत्यु भयो। प्रहरी पनि घटनास्थलमा पुगेको थियो। प्रहरी जवान महेश सिंहले घटनाबारे प्रारम्भिक जानकारी लिएको पुष्टि गरेका छन्।

वर्षासँगै बढ्दो प्राकृतिक जोखिमले गर्दा जनधनको क्षति भइरहेका बेला सतर्कता अत्यावश्यक रहेको स्थानीय प्रशासनले जनाएको छ।