त्रिभुवन विमानस्थलको स्तरोन्नतिका लागि ४ अर्ब १५ करोड बजेट

काठमाडौं । सरकारले त्रिभुवन अन्तर्राष्ट्रिय विमानस्थलको क्षमता विस्तार गर्न आर्थिक वर्ष २०८२/८३ का लागि ४ अर्ब १५ करोड रुपैयाँ बजेट विनियोजन गरेको छ।

बिहीबार बजेट प्रस्तुत गर्दै उपप्रधान तथा अर्थमन्त्री विष्णुप्रसाद पौडेलले त्रिभुवन विमानस्थललाई बुटिक विमानस्थलमा रूपान्तरण गरिने जानकारी दिए। उनले पोखरा अन्तर्राष्ट्रिय विमानस्थललाई पर्यटकीय केन्द्रका रूपमा सञ्चालन गरिने बताए भने गौतमबुद्ध अन्तर्राष्ट्रिय विमानस्थललाई पर्यटक र श्रमिकहरूका लागि किफायती ढंगले सञ्चालन गरिने उल्लेख गरे।

साथै, यी विमानस्थलमार्फत कार्गो सेवा सञ्चालनमा विशेष छुट दिइने सरकारी योजना रहेको छ, जसले व्यापार र पर्यटन दुवै क्षेत्रमा सकारात्मक प्रभाव पार्ने अपेक्षा गरिएको छ।