सतुंगलको कपडा पसलमा भीषण आगलागी, ६ दमकलको प्रयासपछि नियन्त्रणमा

काठमाडौं । चन्द्रागिरि नगरपालिका–११, सतुंगल चोकस्थित एक व्यवसायिक कम्प्लेक्समा आज बिहान भीषण आगलागी भएको छ। बिहान साढे ५ बजे विद्युत सर्टको कारण भएको आगलागीले कम्प्लेक्सभित्रको कपडा पसलमा ठूलो क्षति पु¥याएको छ।

काठमाडौं प्रहरी परिसरका प्रवक्ता एसपी अपिलराज बोहराका अनुसार आगलागी नियन्त्रणका लागि नेपाल प्रहरी, शस्त्र प्रहरी, नेपाली सेना र दमकल टोलीको सहकार्यमा तत्काल उद्धार कार्य सुरु गरिएको थियो।

चन्द्रागिरी नगरपालिकाको दमकलसहित नेपाली सेना विपद् व्यवस्थापन गणबाट १, नेपाल आयल निगम थानकोटबाट १, जुद्ध बारुण यन्त्रबाट २ र ललितपुर महानगरपालिकाबाट १ गरी ६ वटा दमकल परिचालन गरिएको थियो।

द्रुत र संयुक्त प्रयासपछि अहिले आगो नियन्त्रणमा ल्याइएको छ। यद्यपि आगलागीबाट कति क्षति भयो भन्ने विवरण हालसम्म यकिन भइसकेको छैन। घटनाबारे थप अनुसन्धान भइरहेको प्रहरीले जनाएको छ।