काठमाडौं । आगामी जेठ १५ गते रिलिजको तयारीमा रहेको चलचित्र ‘महाभोज’को नयाँ गीत ‘मख्खै परें’ सार्वजनिक भएको छ।
यो गीतमा सुरेन्द्र दियालीको शब्द रचना, प्रशान्त सिवाकोटीको संगीत र स्वर, र ससिका राईको भी भावपूर्ण स्वर रहेको छ। गीतको भिडियोमा चलचित्रका प्रमुख कलाकार दयाहाङ राई, खगेन्द्र लामिछाने, अञ्जना बराइली, गौमाया गुरुङ, र मलिका महतले आकर्षक कौडा नृत्य प्रस्तुत गरेका छन्।
भिडिओमा आर्यन सिग्देललाई गाउँको सम्भ्रान्त व्यक्तिको रूपमा र सुरक्षा पन्तलाई उनकी पत्नीको भूमिकामा देखाइएको छ। मौसम हिमालीले कोरियोग्राफी गरेको भिडियोको अन्त्यमा मलिका र खगेन्द्र छापामारको पोसाकमा प्रस्तुत भएका छन्, जसले भिडियोमा रोचक मोड थपेको छ।
चलचित्रको निर्देशन दिनेश राउतले गरेका छन्, र यसको पटकथा विकास सुवेदीले लेखेका हुन्। ‘महाभोज’ मा आर्यन सिग्देल, दयाहाङ राई, खगेन्द्र लामिछाने, अञ्जना बराइली, गौमाया गुरुङ, मलिका महत, र अन्य चर्चित कलाकारहरूको अभिनय देख्न सकिन्छ।
यस चलचित्रको निर्माण क्लक वर्क क्रियशन र पिक्चर फ्रेमले संयुक्त रूपमा गरेको हो, र यसको निर्माता हिमाल कडरिया छन्।
प्रतिक्रिया