हेमन्त कान्छा रसाइली र रचना रिमालको नयाँ रोमान्टिक गीत ‘चौतारीमा’युट्युबमा सार्वजनिक

काठमाडौं । गायक तथा संगीतकार हेमन्त कान्छा रसाइली र चर्चित गायिका रचना रिमाल को स्वरमा सजिएको नयाँ रोमान्टिक गीत ‘चौतारीमा’ सार्वजनिक भएको छ।

गीत हेमन्त कान्छा रसाइलीको आधिकारिक युट्युब च्यानलमार्फत सार्वजनिक गरिएको हो। आधुनिक र लोक संगीतको मिठास मिश्रित ‘चौतारीमा’ ले नेपाली गाउँघरको चौतारीलाई प्रेम, सम्झना र भावनात्मक भेटघाटको प्रतीकका रूपमा प्रस्तुत गरेको छ। गीतका शब्द र संगीतले प्रेमी–प्रेमिकाबीचका आत्मीय पल, बिछोड र पुराना सम्झनाका भावनात्मक क्षणलाई जीवन्त बनाउने प्रयास गरेका छन्।

गीतमा हेमन्त कान्छा रसाइली र रचना रिमालको स्वर संयोजनलाई श्रोताले निकै रुचाएका छन्। विशेषगरी रचनाको मधुर स्वर र हेमन्तको भावपूर्ण प्रस्तुतीकरणले गीतलाई थप आकर्षक बनाएको प्रतिक्रिया सामाजिक सञ्जालमा देखिन थालेको छ। गीतको निर्देशन स्वयं हेमन्त कान्छा रसाइलीले गरेका हुन् भने छायांकन करण चैसरले गरेका छन्।

सम्पादन तथा कलर ग्रेडिङ मिराज अर्यालले गरेका छन्। भिडियोमा नेपाली परिवेश, गाउँघरको वातावरण र चौतारीसँग जोडिएका भावनात्मक दृश्यहरूलाई आकर्षक ढंगले प्रस्तुत गरिएको छ। गीत सार्वजनिक भएसँगै टिकटक, फेसबुक लगायत सामाजिक सञ्जालमा यसको चर्चा बढ्दो क्रममा छ।

नेपाली लोक तथा आधुनिक संगीत क्षेत्रमा निरन्तर सक्रिय रहेका हेमन्त कान्छा रसाइली र लोकप्रिय गायिका रचना रिमालको यो सहकार्यले युवा पुस्तामाझ विशेष आकर्षण पैदा गर्ने अपेक्षा गरिएको छ।