एचपीसँगको दोस्रो अभ्यास खेलमा नेपाल विजयी

काठमाडौं । क्यानडाको दोस्रो रोजाइको हाइप्रोफमेन्स लाई दोस्रो अभ्यास खेलमा नेपालले पराजित गरेको छ ।

यो जितसँगै तीन खेलको एकदिवसीय सिरिजमा नेपाल र एचपी १–१ को बराबरीमा पुगेका छन् । पहिलो अभ्यास खेलमा नेपाल ३ विकेटले पराजित भएको थियो । नेपालले दिएको १ सय ७७ रनको लक्ष्य पछ्याएको एचपी ४५ दशमलव ३ ओभरमा १ सय ५६ रनमा अल आउट भयो ।

ओलिभर कक्सले ७८ बलमा १ चौका र २ छक्कासहित सर्वाधिक ३९, मुनिर अहमद काका ३६, अली नदिम २०, युवराज शर्मा २३ र विकेटकिपर निकोलस मनोहरले १९ रन बनाए । नेपालका गुल्सन झा र ललित राजवंशीले २–२ विकेट लिए । दीपेन्द्रसिंह ऐरी, रिजन ढकाल र कुशल मल्लले १–१ विकेट लिए ।

त्यसअघि टस जितेर पहिला ब्याटिङ रोजेको नेपाल ४६ दशमलव १ ओभरमा १ सय ७६ रन बनाएर अल आउट भएको थियो ।