उपत्यका भित्रका नदीमा पानीको सतह बढ्दो, सतर्कता अपनाउन आग्रह

काठमाडौं । वर्षाका कारण काठमाडौं उपत्यकाका खोला तथा नदीमा पानीको सतह बढ्न थालेको छ।

जल तथा मौसम विज्ञान विभाग, बाढी पूर्वानुमान महाशाखाका अनुसार धोविखोला, बिष्णुमतीलगायतका खोलामा पानीको सतह बढ्दो क्रममा छ। कपन वर्षामापन केन्द्र र आसपास मध्यम वर्षा भएको छ। बुढानिलकण्ठ क्षेत्रमा एक घन्टामै २५ दशमलव ६ मिलिमिटर वर्षा हुँदा धोबीखोलामा जलसतह बढिरहेको हो। बुढानिलकण्ठ क्षेत्रमा पछिल्लो २४ घन्टामा ७९ दशमलव ४ मिमि वर्षा भएको छ।

यसैगरी, बिष्णुमती खोला गोङ्गबु बसपार्क जलमापन केन्द्रमा पनि जलसतह बढ्दो क्रममा छ। पानीपोखरी क्षेत्रमा पछिल्लो २४ घन्टामा २१ दशमलव ८ मिमि पानी परेको छ।

निरन्तरको बर्षाले नदीमा पानीको बहाव बढ्दै गएकाले नदी किनाराका बासिन्दालाई सचेत हुन महाशाखाले आग्रह गरेको छ ।