काठमाडौं । अमेरिका र वेष्टइन्डिजमा जारी आईसीसी टी–२० विश्वकपमा सोमबार राति दुई टेष्ट राष्ट्र दक्षिण अफ्रिका र बंगलादेशबीच भिडन्त हुँदैछ् ।
खेल नेपाली समय अनुसार राति ८ बजेर १५ मिनेटमा अमेरिकाको नासाउ काउन्टी अन्तर्राष्ट्रिय क्रिकेट मैदानमा हुन लागेको हो । यो त्यही रंगशाला हो जहाँ गएराति भारत र पाकिस्तानको खेल भएको थियो । दक्षिण अफ्रिका र बंगलादेश प्रतियोगिताको समूह डी मा रहेका छन् । उक्त समूहमा, नेपालसहित श्रीलंका र नेदरल्यान्ड्स पनि रहेका छन् ।
यो समूहमा नेपाल र बंगलादेश बाहेक अन्य सबै टोलीले दुई–दुई खेल खेलिसकेका छन् । आज हुने खेल बंगलादेशका लागि जारी विश्वकपमा दोस्रो खेल हो भने नेपालले आगमी १२ तारिखमा आफ्नो दोस्रो खेल श्रीलंकासँग खेल्दैछ् । यो समूहको पहिलो खेलमा दक्षिण अफ्रिकाले श्रीलंकालाई ६ विकेटले हराएको थियो ।
यस्तै समूहको दोस्रो खेलमा नेदरल्यान्ड्सले नेपाललाई ६ विकेटले हराएको थियो । तेस्रो खेलमा बंगलादेशले श्रीलंकालाई दुई विकेटले हराएको थियो । यस्तै चौथौ खेलमा दक्षिण अफ्रिकाले नेदरल्यान्ड्सलाई चार विकेटले हराएको थियो । समूह चरणमा दुई खेल जितेको दक्षिण अफ्रिका ४ अंकसहित शिर्ष स्थानमा रहेको छ भने १ खेल जितेको बंगलादेश २ अंकसहित दोस्रो र दुई अंकसहित नेदरल्यान्ड्स तेस्रो स्थानमा रहेको छ ।
हालसम्म नेपाल र श्रीलंकाले भने खाता खोल्न सकेका छैनन् । अन्तर्राष्ट्रिय क्रिकेट काउन्सिल (आईसीसी)द्वारा जारी पछिल्लो टी–२० अन्तर्राष्ट्रिय वरीयतामा दक्षिण अफ्रिका सातौँ र बंगलादेश नवौँ स्थानमा छन् । टी–२० विश्वकपमा यी दुवै टोलीले नवौँपटक सहभागिता जनाएका हुन् । सन् २००७ मा सम्पन्न पहिलो संस्करणदेखि नै यी दुवै टोलीले नियमित रूपमा टी–२० विश्वकपमा सहभागिता जनाउँदै आएका छन् । दक्षिण अफ्रिका सन् २००९ र सन् २०१४ मा टी–२० विश्वकपको सेमिफाइनलसम्म पुगेको थियो । बंगलादेश भने एकपटक प्रतियोगिताको सुपर–८ चरणसम्म पुगेको छ ।
दक्षिण अफ्रिकाले हालसम्म टी–२० विश्वकपमा कुल ४२ खेल खेलिसकेको छ । दक्षिण अफ्रिका त्यसमध्ये २६ खेलमा विजयी र १५ खेलमा पराजित भएको छ । दक्षिण अफ्रिकाको एक खेल भने अनिर्णीत रूपमा सकिएको छ । यसैगरी बङ्गलादेशले हालसम्म टी–२० विश्वकपमा कुल ३९ खेल खेलेको छ । बंगलादेशी टोलीले त्यसमध्ये १० खेलमा जित हात पारेको छ भने २८ खेलमा पराजय ब्यहोरेको छ । बंगलादेशको एक खेल भने अनिर्णीत रूपमा सकिएको छ ।
टी–२० विश्वकपमा हालसम्म बङ्गलादेशले दक्षिण अफ्रिकालाई हराउन सकेको छैन । यी दुई टोलीबिच हालसम्म अन्तर्राष्ट्रिय क्रिकेटमा कुल आठ खेल खेलिएको छ । त्यसमध्ये आठवटै खेलमा दक्षिण अफ्रिका विजयी भएको छ । यसैगरी टी–२० विश्वकपमा हालसम्म यी दुई टोलीबिच कुल तीन खेल खेलिएको छ ।
त्यसमध्ये तीनवटै खेलमा दक्षिण अफ्रिकाले बंगलादेशलाई हराएको छ ।
प्रतिक्रिया