एजेन्सी । वेस्ट इन्डिज र अमेरिकामा जारी आईसीसी टी–२० पुरुष क्रिकेटको नवौँ संस्करणमा बिहीबार उपाधी दाबेदार राष्ट्र पाकिस्तान र आयोजक राष्ट्र अमेरिका भिड्दैछन् ।
समूह ए मा रहेको पाकिस्तानको यो पहिलो खेल हो । सोहि समूहमा रहेका भारत, क्यानडा र आयरल्याण्डले आफ्नो पहिलो खेल खेलिसकेका छन् । जसमा भारत र अमेरिकाले एक–एक खेलमा जीत समेत हात पारिसकेका छन् । पाकिस्तान र अमेरिकाबीच आज हुने खेल नेपाली समय अनुसार राति ९ बजेर १५ मिनेटमा डालसस्थित ग्रान्ड प्रेरी रंगशालामा हुँदैछ ।
यो त्यही रंगाशाला हो जहाँ नेपाल र नेदरल्याण्डको खेल भएको थियो । दाबेदार राष्ट्र पाकिस्तान आफ्नो पहिलो जितको खोजिमा रहेको छ भने यता अमेरिका भने बलियो राष्ट्रलाई हराउँदै लगातार दोस्रो जितसहित सुपर–८ को यात्रा सहज बनाउने धुनमा रहने छ । पाकिस्तान सन् २००९ को दोस्रो संस्करणको उपाधि विजेता पनि हो ।
त्यसबखत पाकिस्तानले फाइनलमा श्रीलंकालाई आठ विकेटले हराएको थियो । अन्तर्राष्ट्रिय क्रिकेट काउन्सिल (आईसीसी) द्वारा घोषित पछिल्लो टी–२० वरियतामा पाकिस्तान छैटौँ र अमेरिका १८ औँ स्थानमा रहेका छन् । पाकिस्तान टी–२० विश्वकपमा पहिलो संस्करणदेखि नै नियमित सहभागिता जनाउँदै आएको छ । अमेरिका भने टी–२० विश्वकपमा पहिलो पटक आयोजक राष्ट्रका रुपमा सहभागि हुने मौका पाएको हो ।
पाकिस्तानले हालसम्म टी–२० विश्वकपमा कुल ४७ खेल खेलिसकेको छ । जसमा २८ खेलमा विजयी र १८ खेलमा पराजित भएको छ । यसको विपरीत अमेरिकाले टी–२० विश्वकपमा हालसम्म एक खेलमात्रै खेलेको छ । जारी विश्वकपमा अमेरिकाले पहिलो जित निकाल्दै विश्वकपमा सुखद् सुरुवात गरेको थियो । पाकिस्तानले हालसम्म ३ पटक टी–२० विश्वकपको फाइनल खेलेको छ । जसमा एक पटक उपाधि जित्न सफल समेत भएको छ ।
टी–२० विश्वकपको पहिलो संस्करणको फाइनलमा पाकिस्तान भारतसँग ५ रनले पराजित भएको थियो । यस्तै सन् २०२२ को टी–२० विश्वकपको फाइनलमा भने पाकिस्तान इंग्ल्यायन्डसँग पाँच विकेटले पराजित हुन पुगेको थियो । पाकिस्तान र अमेरिकाले हालसम्म टी–२० अन्तर्राष्ट्रिय क्रिकेटमा एक खेल पनि खेलेका छैनन् । आजको खेल यी दुई टोलीको पहिलो भिड्न्त पनि हो । यसरी दुवै टोलीको विगतलाई नियाल्दा पाकिस्तान अमेरिका भन्दा धेरै बलियो देखिन्छ ।
पाकिस्तानको सम्भावित टोलीमा बाबर आजम (कप्तान), मोहम्मद रिजवान, साइम अयुब, फाखर जामन, सदाब खान, ईफ्तिखार अहमद, आजम खान (विकेटकिपर), साहिन शाह अफ्रिदी, नसिम शाह, ह्यारिस रौफ र मोहम्मद आमिर रहेका छन् ।
यस्तै अमेरिकाको सम्भावित टोलीमा मोनांक पटेल (कप्तान एवं विकेटकिपर), स्टिभन टेलर, एन्ड्रिज गौस, एरोन जोन्स, नितिस कुमार, कोरी एन्डर्सन, हरमित सिंह, साड्ली भान साल्कविक, जसदीप सिंह, अली खान र सौरभ नेत्रवाल्कर रहेका छन् ।
प्रतिक्रिया