जेठ १८ गते शुक्रबार दिनभर के–के भयो ?

गृहमन्त्रीको निर्णयविरुद्ध सर्वोच्चमा रिट
विभिन्न कारणले ट्राफिक नियम उल्लंघन गरेकाहरुलाई ट्राफिक प्रहरीले शारीरिक दण्ड दिन थालेको भन्दै सर्वोच्च अदालतमा रिट निवेदन दर्ता भएको छ । मादक पदार्थ सेवन (मापसे) गरेर सवारी चलाउनेहरुलाई स्वयंसेवकका रुपमा सडकमा खटाउने भनी गृहमन्त्री रवि लामिछानेले गरेको निर्णयलाई चुनौती दिई रिट निवेदन दर्ता भएको हो । बझाङका कृष्ण विक, स्याङ्जाका आकाश भट्ट लगायत ७ जनाले गृहमन्त्री लामिछानेको निर्णयमाथि चुनौती दिई सर्वोच्च अदालतमा रिट हालेका हुन् । शुक्रबार दर्ता भएको उनीहरुको रिट निवेदनमाथि आइतबार प्रारम्भिक सुनुवाई हुनेछ ।

बालेन र वडाध्यक्षबीच चर्काचर्की
काठमाडौं महानगरपालिकाको कार्यपालिका बैठकमा न्यूरोडमा महानगरले गरिरहेको फुटपाथ विस्तारको बिषयमा मेयर बालेन्द्र साह (बालेन) र का.म.न.पा वडा नम्बर २२ का वडाध्यक्ष चिनिकाजी महर्जनबीच चर्काचर्की भएको छ । वडाध्यक्ष महर्जनले आफूलाई महानगरले सौतेनी व्यवहार गरेको भन्दै आफ्नो क्षेत्रमा फुटपाथ विस्तार हुँदा पत्रिका पढेर थाहा पाउनुपर्ने भन्दै प्रश्न गरेका थिए । तर, मेयर बालेनले फुटपाथ विस्तारको काम वडा नम्बर २२ मा नभई वडा नम्बर २४ मा भइरहेको स्पष्ट पारेका थिए । २४ नम्बर वडाध्यक्षले मान्छे फुटपाथमा हिँड्न गाह्रो भयो, पाकेटमार बढ्यो, यौन दुव्र्यवहार भयो, साँघुरो भयो भनेर भनेकाले फुटपाथ विस्तारको काम सुरु गरिएको बताएका थिए । साथै मेयर बालेनले वडा नम्बर २४ मा फुटपाथ विस्तारको काम हुँदा २२ को वडाध्यक्ष तपाईँलाई के समस्या ? भन्दै वडाध्यक्ष महर्जनलाई प्रश्न समेत गरेका थिए ।

माधव–प्रचण्ड सम्बन्धमा दरार !
प्रधानमन्त्री पुष्पकमल दाहाल प्रचण्डले एकीकृत समाजवादीका कारण सत्ता गठबन्धनमा कुनै समस्या नआउने बताएका छन् । बजेटबारे छलफल गर्न शुक्रबार बसेको माओवादी संसदीय दलको बैठकमा सांसदहरुले एकीकृत समाजवादीका अध्यक्ष माधवकुमार नेपालको दौडधुपबारे चासो राखेका थिए । नेता नेपाल बुधबार नेपाली कांग्रेसका सभापति शेरबहादुर देउवा निवास बुढानिलकण्ठमा भएको विपक्षी दलहरुको बैठकमा सहभागि भएका थिए । माओवादी संसदीय दलका नेतासमेत रहेको प्रधानमन्त्री प्रचण्डले भने आफूसँग परामर्श गरेर नै माधव नेपाल बुढानिलकण्ठ पुगेको बताएका हुन् ।

अवैद्य सुन तस्करी प्रकरणमा थर्कमान लामा पक्राउ
६० किलोभन्दा बढी अवैद्य सुन तस्करी प्रकरणमा काभ्रोका थर्कमान लामा पक्राउ परेका छन् । तेमाल गाउँपालिका घर भएका ४५ वर्षीय लामालाइ केन्द्रीय अनुसन्धान ब्यूरो (सिआईबी) ले लाजिम्पाटबाट पक्राउ परेको हो । कान्छामान भनेर समेत चिनिने थर्कमान नेपाली कांग्रेसमा आबद्ध छन् । पूर्वन्यायाधीश डिल्लीराज आचार्य अध्यक्ष रहेको सुन तस्करी जाँचबुझ आयोगको प्रतिवेदनका आधारमा सीआईबीले अहिले दोस्रो चरणको अनुसन्धान अघि बढाएको छ । राजश्व अनुसन्धान विभागले २ साउनमा त्रिभुवन अन्तर्राष्ट्रिय विमानस्थलको भन्सार जाँचपास भएर बाहिरिँदै गरेको ६० किलोभन्दा बढी सुन बरामद गरेको थियो ।

कान्तिपुर सहकारीका पूर्व अध्यक्ष लामा पक्राउ
कान्तिपुर सेभिङ एन्ड क्रेडिट कोअपरेटिभ संस्थाका तत्कालीन अध्यक्ष सीबी लामा पक्राउ परेका छन् । काठमाडौं उपत्यका अपराध अनुसन्धान कार्यालयको टोलीले उनलाई पक्राउ गरेको हो । उनलाई भारतीय सीमा छेउबाट पक्राउ गरिएको प्रहरीले जनाएको छ । लामो हाल पशुपति सेभिङ एन्ड क्रेडिटका अध्यक्ष समेत रहेका छन् । उनले कान्तिपुर सहकारीको ६ अर्ब र पशुपतिको २ अर्ब गरी ८ अर्ब रकम अपचलन गरेको आरोप लागेको छ ।

बलात्कार मुद्दामा दोषी देखिए ट्रम्प
न्यूयोर्कको १२ सदस्यीय जुरीले अमेरिकी पूर्व राष्ट्रपति डोनाल्ड ट्रम्पमाथि लागेको सबै ३४ आरोपहरुमै दोषी ठहर्याएको छ । दुई दिनसम्म चलेको सुनुवाई पछि जुरीले ट्रम्पलाई दोषी ठहर गरेको हो । अमेरिकाको इतिहासमा पहिलो पटक पूर्वराष्ट्रपति ट्रम्पविरुद्ध आपराधिक अभियोग दर्ज भएको थियो । सन २०१६ मा भएको राष्ट्रपति निर्वाचन अघि पोर्नस्टार स्टोर्मी डेनियल्ससँग यौन सम्बन्ध राखेको र उनलाई चुप लगाउन अनधिकृत रुपमा रकम दिएको आरोप ट्रम्पमाथि थियो ।

यात्रा अनुमति नभएका हतियार बोक्न रोक
कानुन बमोजिम इजाजल पत्र पाएपनि यात्रा अनुमति नलिएका हतियार बाहकलाई घर बाहिर लैजान रोक लगाइएको छ । बिहीबार बसेको मन्त्रिपरिषद् बैठकले सो निर्णय गरेको हो । हातहतियार खरखजाना ऐन–२०१९ को संशोधित व्यवस्था २०७४ अनुसार निश्चित स्थानमा मात्र बोक्न पाउनेगरी इजाजतपत्र दिने व्यवस्था छ । तोकिएको ठाउँभन्दा बाहेक अन्यत्र हतियार लैजानुपर्दा हरेक पटक प्रमुख जिल्ला अधिकारीसँग ‘यात्रा अनुमति’ लिनुपर्ने कानुनी व्यवस्था छ । सर्वोच्च अदालतबाट दुर्गा प्रसाईंको हतियार बरामद गरेपछि मन्त्रिपरिषद्ले इजाजत प्राप्त हतियार बोक्न थप कडाइ गरेको हो ।