काठमाडौं । जारी आईसीसी टी-२० विश्वकप २०२६ अन्तर्गत आफ्नो तेस्रो खेलमा नेपाल दुई पटकको च्याम्पियन वेस्ट इन्डिज सँग पराजित हुँदै प्रतियोगिताको समूह चरणबाटै बाहिरिएको छ।
लगातार तीन खेल जित्दै वेस्ट इन्डिज सुपर एटमा पुग्ने पहिलो टोली बनेको छ भने तीनै खेलमा हार बेहोरेपछि नेपाल प्रतियोगिताबाट बाहिरिने दोस्रो टोली बन्यो। नेपाल यसअघि इंग्ल्याण्ड र इटली सँग पनि पराजित भएको थियो। समूह ‘सी’ मा वेस्ट इन्डिज अपराजित रहँदै ६ अंकसहित शीर्ष स्थानमा छ।
इंग्ल्याण्ड दुई जित र एक हारसहित ४ अंक लिएर दोस्रो स्थानमा छ भने स्कटल्याण्ड र इटली समान २–२ अंकसहित क्रमशः तेस्रो र चौथो स्थानमा छन्। अब इंग्ल्याण्ड र वेस्ट इन्डिजले इटलीसँग खेल्न बाँकी छ। इंग्ल्याण्डले इटलीलाई हराए सुपर एटमा स्थान सुरक्षित गर्नेछ, जबकि इटलीका लागि बाँकी दुवै खेल जित्नुपर्ने दबाब छ।
नेपाल भने तीनै खेलमा पराजित हुँदै अंकविहीन बनेको छ। मंगलबार स्कटल्याण्डविरुद्ध हुने अन्तिम खेल नेपालका लागि प्रतिष्ठाको लडाइँ मात्र हुनेछ।
प्रतिक्रिया