काठमाडौं । आइसिसी टी–२० विश्वकपअन्तर्गत समूह ‘सी’ को खेलमा नेपाल इटालीसँग १० विकेटले पराजित भएको छ।
पहिलो पटक युरोपेली छनोट पार गरेर विश्वकपमा पुगेको इटालीले पहिलो सहभागितामै ऐतिहासिक जित हात पारेको हो। यसअघि पहिलो खेलमा स्कटल्यान्डसँग ७३ रनले हारेको इटालीले नेपालविरुद्ध उत्कृष्ट पुनरागमन गर्यो। नेपाल र इटालीबीच टी–२० मा यो पहिलो भेट थियो।
उक्त भेटमै इटालीले प्रभावशाली जित निकाल्दै एकदिवसीय क्रिकेटमा बेहोरेका हारको बदला समेत लिएको छ। लगातार दोस्रो हारपछि नेपालको सुपर–८ पुग्ने सम्भावना निकै कमजोर बनेको छ। नेपाल अब आइतबार दुई पटकको विश्वकप विजेता वेष्ट इन्डिजसँग खेल्नेछ भने समूह चरणको अन्तिम खेल स्कटल्यान्डसँग हुनेछ।
पहिलो खेलमा भने नेपाल इंग्ल्यान्डसँग केवल ४ रनले पराजित भएको थियो। मुम्बईस्थित वानखेडे रंगशालामा टस हारेर पहिले ब्याटिङ गरेको नेपाल १९.२ ओभरमा अलआउट हुँदै १२३ रनमा सीमित रह्यो। जवाफमा इटालीले १२.४ ओभरमै कुनै विकेट नगुमाई लक्ष्य भेट्टायो। नेपाली बलरहरूले विकेट निकाल्न नसक्दा खेल एकतर्फी बनेको थियो।
इटालीको जितमा जस्टिन र एन्थोनी मोस्का दाजुभाइ चम्किए। उनीहरूले पहिलो विकेटका लागि १२४ रनको अविजित साझेदारी गरे। जस्टिनले ४४ बलमा ५ चौका र ३ छक्कासहित ६० रन बनाए भने एन्थोनीले ३२ बलमा ३ चौका र ६ छक्काको मद्दतले ६२ रन जोडे।
कप्तान रोहितकुमार पौडेलले ६ जना बलर प्रयोग गरे पनि विकेट लिन सकेनन्।
प्रतिक्रिया