काठमाडौं । आईसीसी टी–२० विश्वकप २०२६ अन्तर्गत आफ्नो पहिलो खेल खेलिरहेको नेपालले इंग्ल्यान्डविरुद्ध चुनौतपूर्ण लक्ष्य पाएको छ।
वाङ्खडे स्टेडियममा टस जितेर पहिले ब्याटिङ गरेको इंग्ल्यान्डले निर्धारित २० ओभरमा ७ विकेट गुमाउँदै १८४ रन बनायो । इंग्ल्यान्डका लागि ज्याकब बेथेलले ३५ बलमा चार चौका र चार छक्कासहित सर्वाधिक ५५ रनको योगदान दिए। कप्तान ह्यारी ब्रूकले पनि उत्कृष्ट प्रदर्शन गर्दै ३२ बलमा ५३ रन जोडे, जसमा चार चौका र तीन छक्का समावेश थिए।
अन्तिम चरणमा विल ज्याक्सले आक्रामक ब्याटिङ गर्दै १८ बलमै अविजित ३९ रन बनाए र टोलीलाई बलियो स्कोरसम्म पुर्याए। उनले एक चौका र चार छक्का प्रहार गरे। नेपालले भने सुरुवातमै सफलता पाएको थियो। ओपनर फिल साल्टलाई शेर मल्लले आफ्नो पहिलो बलमै आउट गर्दै इंग्ल्यान्डलाई दबाबमा पारेका थिए।
एक समय ५७–३ को स्थितिमा पुगेको इंग्ल्यान्डलाई बेथेल र कप्तान ब्रूकले चौथो विकेटका लागि ७१ रनको साझेदारी गर्दै सम्हाले। नेपालका बलरमध्ये दीपेन्द्र सिंह ऐरी र नन्दन यादवले समान दुई–दुई विकेट लिए भने शेर मल्ल र सन्दीप लामिछानेले एक–एक विकेट हात पारे।
प्रतिक्रिया