काठमाडौं । नेपालकी पूर्वप्रधानन्यायाधीश सुशीला कार्कीलाई अन्तरिम सरकारको प्रमुखको रूपमा नियुक्त गर्ने सहमति जुटेको छ। सहमति बनेसँगै राष्ट्रपति रामचन्द्र पौडेलले कार्कीलाई आजै सो पदमा नियुक्त गर्ने तयारी गरेका छन्।
राष्ट्रपतिका प्रेस सल्लाहकार किरण पोखरेलका अनुसार कार्कीले साँझ ९ बजे शपथग्रहण गर्नेछिन्।
यसअघि नयाँ सरकार गठनसम्बन्धी छलफलका लागि सुशीला कार्की, जेनजी अभियन्ता तथा हामी नेपाल संस्थाका अध्यक्ष सुदन गुरुङ र अधिवक्ता ओमप्रकाश अर्याल शीतलनिवास पुगेका थिए।
यद्यपि अन्तरिम सरकारको नेतृत्व कार्कीले गर्ने सहमति भए पनि संसद् विघटनको विषयमा भने सर्वसम्मति बन्न सकेको छैन। पोखरेलका अनुसार, यसबारे औपचारिक जानकारी कार्कीको नियुक्तिसँगै सार्वजनिक गरिनेछ।
प्रधानमन्त्री केपी शर्मा ओलीले भदौ २३ र २४ गतेको जेनजी आन्दोलनको तीव्र दबाबपछि मंगलबार पदबाट राजीनामा दिएका थिए। असामान्य राजनीतिक परिस्थितिलाई ध्यानमा राख्दै राष्ट्रपति पौडेलले सोही दिन ओलीको राजीनामा स्वीकृत गरेका थिए।
प्रतिक्रिया