काठमाडौं । नेपालका सांसद योगेश गौचन थकालीले जनसंख्या र विकाससम्बन्धी सांसदहरूको एसियाली फोरम (एएफपीपीडी) को वार्षिक क्षेत्रीय सम्मेलनमा नेपालको तर्फबाट प्रतिनिधित्व गरेका छन्।
फिलिपिन्समा भइरहेको उक्त सम्मेलनमा उनले नेपालले दीगो विकास लक्ष्य (एसडीजी) २०३० का एजेन्डा कार्यान्वयनमा हासिल गरेका उपलब्धि तथा सामना गरिरहेका चुनौतीबारे विस्तृत प्रस्तुति दिएका थिए। साथै, ‘सांसदहरूको सञ्जाल’ शीर्षकमा आयोजित चौथो सेसनको सहजीकरण गर्दै उनले नेपालको अनुभव र दृष्टिकोण प्रस्तुत गरेका थिए।
सांसद गौचन एएफपीपीडीको ‘युवा लगानी स्थायी समिति’ का सह–अध्यक्ष समेत हुन्। यस समितिमा युवा सांसदहरूको नेतृत्वमा नीति निर्माण र कार्यान्वयनलाई प्रभावकारी बनाउन जोड दिइन्छ।
फोरममा सहभागी भएर नेपालको तर्फबाट आवाज उठाउन पाउनु गर्वको विषय भएको सांसद गौचनले बताएका छन्। उनले निर्वाचित भएयता अन्तर्राष्ट्रिय स्तरका विभिन्न संसदीय मञ्चमा सक्रिय सहभागिता जनाउँदै आएका छन्।
सांसद गौचन मुस्ताङबाट निर्वाचित जनप्रतिनिधि हुन् र हाल संघीय संसदमा नेपालका युवाको दृष्टिकोणलाई प्रभावकारी रूपमा प्रस्तुत गर्दै आएका छन्।
प्रतिक्रिया