सेयर बजार १० अंकभन्दा बढीले घट्यो, कारोबार ६ अर्ब नाघ्यो

काठमाडौं । सातामा तेस्रो दिन शेयर बजार बुधबार दोहोरो अंकले ओरालो लागेको छ।

नेप्से सूचक १०.५० अंकले घटेर २७८५.७४ अंकमा झरेको छ। आजको कुल कारोबार रकम ६ अर्ब १६ करोड रुपैयाँ पुगेको छ। आज ८९ कम्पनीको मूल्य बढ्दा १५९ कम्पनीको मूल्य घटेको छ भने १ कम्पनीको मूल्य स्थिर रह्यो। समूहगत सूचकमा मिश्रित अवस्था देखियो—१३ मध्ये ४ समूहमा वृद्धि र ९ समूहमा गिरावट आएको छ।

सबैभन्दा धेरै ट्रेडिङ समूह १.५० प्रतिशतले घटेको छ, जबकि अन्य समूहको उतारचढाव १ प्रतिशतभन्दा कम रह्यो। कम्पनीगत रूपमा, मायाखोला हाइड्रोपावर ५.७४ प्रतिशतले बढ्दै शीर्ष स्थानमा रह्यो भने कुमारी बैंकको डिबेञ्चर २०८६ ९.४८ प्रतिशतले घट्दै सबैभन्दा ठूलो गिरावटमा पर्‍यो।

कारोबार रकमको हिसाबले बलेफी हाइड्रोपावर ३४ करोड रुपैयाँको सेयर कारोबारसहित अग्रस्थानमा रह्यो।