काठमाडौं । नेपाल प्रिमियर लिग (एनपीएल)को दोस्रो संस्करणमा डिफेन्डर सूर्य तामाङ विराटनगर किङ्सबाट मैदानमा उत्रिने भएका छन्।
शनिबार काठमाडौंमा सम्पन्न मिनी अक्सनमार्फत विराटनगरले उनलाई आफ्नो टोलीमा भित्र्याएको हो। ‘बी’ श्रेणीमा सूचीकृत तामाङका लागि क्लबले अधिकतम रकम १० लाख रूपैयाँ खर्च गरेको छ। यस श्रेणीमा खेलाडीहरूको मूल्य सीमा न्यूनतम पाँच लाखदेखि अधिकतम १० लाख रूपैयाँसम्म निर्धारण गरिएको छ।
यस पटकको अक्सनमा सहभागी टिमहरूमा साविक विजेता जनकपुर बोल्ट्स, काठमाडौं गोर्खाज, कर्णाली याक्स, चितवन राइनोज, साविक उपविजेता सुदूरपश्चिम रोयल्स, लुम्बिनी लायन्स, विराटनगर किङ्स र पोखरा एभेन्जर्स रहेका थिए।
एनपीएलमा खेलाडी मूल्य निर्धारण तीन श्रेणीमा विभाजन गरिएको छ — ‘ए’ श्रेणीका लागि १० देखि १५ लाख, ‘बी’ श्रेणीका लागि पाँचदेखि १० लाख, र ‘सी’ श्रेणीका लागि दुईदेखि पाँच लाख रूपैयाँसम्मको सीमा तय गरिएको छ।
प्रतिक्रिया