काठमाडौं । अस्ट्रेलियाली क्रिकेट टोलीले टी-२० अन्तर्राष्ट्रिय शृंखलामा नयाँ इतिहास रच्दै वेस्ट इन्डिजलाई ५-० ले क्लिन स्वीप गरेको छ ।
मंगलबार बिहान सम्पन्न पाँचौं तथा अन्तिम खेलमा ३ विकेटको रोमाञ्चक जितसँगै अस्ट्रेलियाले पहिलोपटक टी-२०आई शृंखलामा पाँचै खेल जित्ने उपलब्धि हासिल गरेको हो । १७१ रनको लक्ष्य पछ्याएको अस्ट्रेलियाले १७ ओभरमा ७ विकेट गुमाउँदै लक्ष्य भेट्टायो । अस्ट्रेलियाका मिचेल ओवेनले आक्रामक ब्याटिङ गर्दै १७ बलमा ३७ रन जोडे ।
क्यामरन ग्रीनले १८ बलमा ३२ तथा टिम डेभिडले १२ बलमा ३० रन बनाएर टोलीको जितमा महत्वपूर्ण योगदान दिए । वेस्ट इन्डिजका बलर अकिल होसेनले प्रभावशाली प्रदर्शन गर्दै ४ ओभरमा मात्र १७ रन खर्चिएर ३ विकेट लिएका थिए । अल्जारी जोसेफ र जेसन होल्डरले २-२ विकेट लिएर अस्ट्रेलियालाई दबाबमा राख्न प्रयास गरे पनि सफल हुन सकेनन् ।
यसअघि टस हारेर पहिले ब्याटिङ गरेको वेस्ट इन्डिजले १९.४ ओभरमा सबै विकेट गुमाउँदै १७० रन बनायो । शिम्रोन हेटमायरले विस्फोटक ब्याटिङ गर्दै ३१ बलमा ३ चौका र ३ छक्का प्रहार गर्दै ५२ रन बनाए भने शेरफन रदरफोर्डले ३५ रनको योगदान दिए ।
अस्ट्रेलियाका बेन डारशुइसले ३ विकेट लिए भने नेथन एलिसले २ विकेट लिए । एडम जाम्पा, शन एबट, आरोन हार्डी र ग्लेन म्याक्सवेलले समान १–१ विकेट लिएर विपक्षी टोलीलाई थाम्न सफल भए ।
यसअघि अस्ट्रेलियाले पहिलो खेलमा ३ विकेट, दोस्रोमा ८ विकेट, तेस्रोमा ६ विकेट र चौथो खेलमा ३ विकेटले जित निकालेको थियो । टी-२० शृंखलाअघि भएको तीन खेलको टेस्ट शृंखलामा समेत अस्ट्रेलिया अपराजित रहँदै विजयी भएको थियो ।
प्रतिक्रिया