काठमाडौं । हाल नेपालभर मनसुन सक्रिय अवस्थामा रहेको छ। मनसुनजन्य न्यून चापीय रेखा सरदर स्थान नजिकै रहेकाले अधिकांश भागमा मौसम बदली भएको छ।
मौसम पूर्वानुमान महाशाखाका अनुसार कोशी, मधेस, बागमती, गण्डकी, कर्णाली र सुदूरपश्चिम प्रदेशका थोरै स्थानहरूमा तथा लुम्बिनी प्रदेशका एक-दुई ठाउँमा हल्कादेखि मध्यम वर्षा भइरहेको छ।
सोमबार दिउँसो देशभर आंशिकदेखि सामान्य बदली रहनेछ। विशेषगरी गण्डकी, बागमती र सुदूरपश्चिम प्रदेशका पहाडी भू-भागमा र तराईका केही स्थानहरूमा मेघगर्जन, चट्याङसहित मध्यम वर्षा हुने सम्भावना छ। साथै बागमती, गण्डकी र लुम्बिनी प्रदेशका केही पहाडी क्षेत्रहरूमा भारी वर्षा हुनसक्ने पूर्वानुमान गरिएको छ।
आज राति पनि गण्डकी प्रदेश लगायतका पहाडी तथा केही तराई भू-भागमा मेघगर्जन र चट्याङसहित मध्यम वर्षाको सम्भावना रहँदा, एक-दुई स्थानमा भारी वर्षा हुन सक्ने देखिएको छ।
मौसम विभागले सर्वसाधारण र सम्बन्धित निकायहरूलाई सम्भावित जोखिमलाई मध्यनजर गर्दै आवश्यक सतर्कता अपनाउन र पछिल्ला अपडेटहरू नियमित रूपमा अवलोकन गर्न अनुरोध गरेको छ।
प्रतिक्रिया