काठमाडौं । साउदी अरबका राजकुमार अल वालिद बिन खालिद बिन तलाल अल साउदको दुःखद निधन भएको छ। उनी झन्डै २० वर्षसम्म कोमामा रहेका थिए।
सन् २००५ मा १५ वर्षको उमेरमा बेलायतको लन्डनमा सैनिक तालिमका क्रममा कार दुर्घटनामा परेपछि उनी गम्भीर घाइते भए। मस्तिष्कमा गहिरो चोट र रक्तस्रावपछि उनी अचेत अवस्थामा पुगेका थिए। त्यस यता राजकुमार वालिदलाई ‘स्लीपिङ प्रिन्स’ (सुतिरहेको राजकुमार) भनेर चिनिन्थ्यो।
अमेरिकी र स्पेनिस चिकित्सकहरूको संयुक्त प्रयासबाट उपचार भए पनि उनी कहिल्यै होसमा फर्कन सकेनन्। उनको अवस्थाले केवल साउदी मात्रै होइन, विश्वभरका मानिसहरूको सहानुभूति बटुलेको थियो। कहिलेकाहीँ हुने शरीरका हल्का गतिविधिहरूले परिवारमा आशा जाग्ने गर्थ्यो।
राजकुमारका पिता खालिद बिन तलालले चिकित्सकहरूको जीवन समर्थन उपकरण हटाउने सुझाव अस्वीकार गर्दै छोरा एकदिन निको हुने विश्वास राखे। उनी निरन्तर राजकुमारको शय्या छेउ बसेर कुरानको पाठ सुनाउँथे, छोरा वालिदलाई चुम्बन गर्दै हौसला दिन्थे।
सन् २०२५, जुलाई १९ मा साउदीको एक विशेष स्वास्थ्य केन्द्रले राजकुमारको निधनको पुष्टि गरेपछि देशभर श्रद्धाञ्जलीको लहर छाएको छ। धैर्यता, पितृमाया र विश्वासको प्रतीकका रूपमा सम्झिनेहरूप्रति गल्फ न्युजले पनि सम्मान व्यक्त गरेको छ।
प्रतिक्रिया