काठमाडौं । बंगलादेशमा जारी साफ यू-२० महिला च्याम्पियनसिप अन्तर्गत नेपालले आज आफ्नो पाँचौं खेलमा भुटानसँग प्रतिस्पर्धा गर्नेछ।
डबल राउन्ड रोबिन फर्म्याटमा सञ्चालन भइरहेको प्रतियोगितामा नेपाल र भुटानबीचको यो दोस्रो भिडन्त हो। खेल ढाका स्थित बसुन्धरा स्पोर्ट्स मैदानमा नेपाली समयअनुसार दिउँसो २:४५ बजे सुरु हुनेछ। नेपालले पहिलो चरणमा भुटानलाई ६–१ ले पराजित गरेको थियो। त्यसपछि बंगलादेशसँगको प्रतिस्पर्धामा ३–२ ले पराजित भए पनि श्रीलंकासँग लगातार दुई खेलमा ७–० को फराकिलो जित हात पारेको छ।
भुटानले हालसम्म नेपालसँगको एक खेल र बंगलादेशसँग दुई खेलमा हार बेहोरेको छ। यद्यपि उसले श्रीलंकालाई पराजित गर्दै ३ अंक जोड्न सफल भएको छ। अहिलेको अंकतालिकामा घरेलु टोली बंगलादेश १२ अंकसहित शीर्ष स्थानमा छ। नेपाल ९ अंकसहित दोस्रो स्थानमा छ भने भुटान ३ अंकका साथ तेस्रो स्थानमा छ।
चार टोली सहभागी प्रतियोगिता डबल राउन्ड रोबिन आधारमा खेलाइँदैछ। सबै टोली एक–अर्कासँग दुई पटक भिड्नेछन् र सर्वाधिक अंक हासिल गर्ने टोली च्याम्पियन घोषित हुनेछ।
नेपालले अन्तिम खेल सोमबार बंगलादेशसँग खेल्ने तालिका रहेको छ। आजको खेल नेपालका लागि फाइनल पुग्ने सम्भावना बलियो बनाउने अवसर पनि हो।
प्रतिक्रिया