काठमाडौं । आर्थिक वर्ष २०८१/८२ मा सरकारले कुल ११ खर्ब ७८ अर्ब ८२ करोड रुपैयाँ राजस्व संकलन गरेको छ।
अघिल्लो आर्थिक वर्ष २०८०/८१ मा संकलित १० खर्ब ५८ अर्ब रुपैयाँको तुलनामा यो रकम एक खर्ब २० अर्बले बढी हो। यो ११.३३ प्रतिशतको वृद्धिदर हो, जुन पछिल्ला वर्षहरूमा राजस्व वृद्धिको हिसाबले उल्लेखनीय मानिन्छ। सरकारले चालु आवमा सुरुमा १४ खर्ब १९ अर्ब राजस्व संकलन गर्ने लक्ष्य राखेको थियो।
तर, अर्धवार्षिक समीक्षा पछि सो लक्ष्य घटाएर १२ खर्ब ८६ अर्ब पुर्याइएको थियो। संशोधित लक्ष्यअनुसार सरकारले ९१.६० प्रतिशत राजस्व संकलन गर्न सफल भएको छ। अर्थ मन्त्रालयको राजस्व महाशाखाका प्रमुख उत्तरकुमार खत्रीका अनुसार, विभिन्न विपद् र अन्तर्राष्ट्रिय चुनौतीका बाबजुद पनि राजस्व संकलन सन्तोषजनक रहेको छ।
उनका अनुसार, “पछिल्लो वर्षको तुलनामा राम्रो प्रगति भएको छ, अब चालु आर्थिक वर्षमा तय गरिएको १३ खर्ब १५ अर्बको लक्ष्य प्राप्त गर्ने दिशामा तयारी भइसकेको छ।” गत दशकको राजस्व संकलन विवरण हेर्दा पनि प्रगतिशील वृद्धि देखिन्छ:
- २०७१/७२: ४ खर्ब ५ अर्ब
- २०७२/७३: ४ खर्ब ८१ अर्ब
- २०७३/७४: ६ खर्ब ९ अर्ब
- २०७४/७५: ७ खर्ब २६ अर्ब
- २०७५/७६: ८ खर्ब २९ अर्ब
- २०७६/७७: ७ खर्ब ९३ अर्ब
- २०७७/७८: ९ खर्ब ३५ अर्ब
- २०७८/७९: १० खर्ब ६६ अर्ब
- २०७९/८०: ९ खर्ब ५७ अर्ब
- २०८०/८१: १० खर्ब ५८ अर्ब
राजस्व वृद्धिको यो क्रमले देखाउँछ कि नेपालको आन्तरिक स्रोत परिचालनमा क्रमशः सुधार भइरहेको छ, यद्यपि लक्ष्य अनुसारको पूर्ण संकलन अझै चुनौतीपूर्ण नै छ।
चालु वर्षमा लक्ष्य अनुसारको संकलन गर्न कर प्रशासन सुधार, नीति कार्यान्वयन र डिजिटल प्रविधिको प्रयोग निर्णायक हुन सक्छ।
प्रतिक्रिया