किङ्स कलेजले साउन १० र ११ गते नेपाल आन्टरप्रेनरशिप फोरम आयोजना गर्ने

काठमाडौं । उद्यमशीलता र व्यवसाय शिक्षामा अग्रणी किङ्स कलेजले आगामी साउन १० र ११ गते दोस्रो संस्करणको नेपाल आन्टरप्रेनरशिप फोरम आयोजना गर्ने भएको छ।

‘Towards Sustainable Entrepreneurship Ecosystem‘ भन्ने नाराका साथ आयोजना हुने यो अन्तर्राष्ट्रिय सम्मेलनमा नेपालसहित फिनल्याण्ड, जापान, भारत, बङ्गलादेश र कोसोभो लगायतका देशबाट २५ भन्दा बढी वक्ताहरू सहभागी हुनेछन्। कलेजका अनुसार यो दुई दिने कार्यक्रमले शिक्षाविद्, उद्यमी, नीतिनिर्माता, पेशाकर्मी र सरोकारवालाहरूलाई एउटै मंचमा ल्याउनेछ।

सम्मेलनमा शैक्षिक अनुसन्धान र व्यावसायिक अभ्यासबीचको सम्बन्धलाई जोड्ने गरी विचार-विमर्श, शोधपत्र प्रस्तुतिकरण, नवप्रवर्तन प्रदर्शन र सञ्जाल निर्माणका सत्रहरू समावेश गरिनेछ। कार्यक्रम संयोजक तथा किङ्स कलेजका प्राध्यापक चित्तरञ्जन पाण्डेका अनुसार, यस्ता सम्मेलनहरूले नेपालमा नवप्रवर्तनलाई प्रोत्साहन गर्नुका साथै युवा पुस्तालाई चुनौतीहरूसँग जुझ्ने प्रेरणा प्रदान गर्ने विश्वास गरिएको छ।

साथै, सम्मेलनले दिगो आर्थिक विकास, बेरोजगारी न्यूनीकरण, र उद्यमशीलताको समृद्ध पारिस्थितिकी निर्माणमा पनि सहयोग पुर्‍याउने उनले बताए।

कलेजले जानकारी दिएको अनुसार सम्मेलनमा २०० भन्दा बढी सहभागी रहनेछन्, जसमा स्थानीय तथा अन्तर्राष्ट्रिय उद्यमी, अनुसन्धानकर्ता, विकास साझेदार, सरकारी प्रतिनिधि र विद्यार्थीहरू रहनेछन्।