काठमाडौं । बंगलादेशमा जारी साफ यू–२० महिला च्याम्पियनसिपअन्तर्गत नेपालले आज आफ्नो तेस्रो खेलमा श्रीलंकाको सामना गर्दैछ।
खेल नेपाली समयअनुसार साँझ ६:४५ बजे बसुन्धरा किङ्स एरेनामा सुरु हुनेछ। नेपालले प्रतियोगितामा पहिलो खेलमा भुटानलाई ६–१ गोलअन्तरले पराजित गर्दै शानदार सुरुवात गरेको थियो। तर दोस्रो खेलमा घरेलु टोली बंगलादेशसँग ३–२ ले पराजित भएको थियो। श्रीलंकाको प्रदर्शन भने हालसम्म कमजोर देखिएको छ।
उसले बंगलादेशसँग पहिलो खेलमा ९–१ को ठूलो अन्तरले हार बेहोरेको थियो भने दोस्रो खेलमा भुटानसँग पनि ५–० ले पराजित भएको थियो। नेपालका लागि बाँकी खेलहरू जितेर गोलअन्तरमा सुधार गर्न सके उपाधि जित्ने सम्भावना कायम छ। हालसम्म बंगलादेश दुई खेलमा ६ अंकसहित शीर्ष स्थानमा रहेको छ। नेपाल र भुटान दुवैको तीन–तीन अंक रहेकोमा गोलअन्तरका आधारमा नेपाल दोस्रो स्थानमा छ।
चार राष्ट्र सहभागी च्याम्पियनसिप डबल राउन्ड रोबिन फर्म्याटमा खेलाइँदैछ। प्रतियोगिताको अन्त्यमा सर्वाधिक अंक जोड्ने टोली च्याम्पियन घोषित हुनेछ।
प्रतिक्रिया