बैतडी । बैतडीको पाटन नगरपालिका–६ स्थित खिपाली मोडमा शनिबार बिहान जिप दुर्घटना हुँदा दुई जनाको ज्यान गएको छ भने छ जना घाइते भएका छन्।
दशरथचन्द राजमार्ग अन्तर्गत सुपप्र–०१–००१ ज १३७२ नम्बरको जिप बिहान करिब ६ बजे दुर्घटनामा परेको हो। जिल्ला प्रहरी कार्यालयका अनुसार जिप करिब ७० मिटर तल खसेको थियो। दुर्घटनामा गम्भीर घाइते भएका डिलासैनी गाउँपालिका–१ नगराउका २४ वर्षीय सन्तोषबहादुर राना (जिप चालक) र ३२ वर्षीय किरण चौधरीको पाटन प्राथमिक स्वास्थ्य केन्द्रमा उपचारका क्रममा मृत्यु भएको प्रदेश ट्राफिक प्रहरी कार्यालयका प्रवक्ता डिएसपी टेकबहादुर जोराले जानकारी दिए।
अन्य घाइतेहरूमा डिलासैनी गाउँपालिका–१ निवासी ४२ वर्षीय रामबहादुर राना, ५१ वर्षीया कमला धामी, २७ वर्षीय राजेन्द्र बहादुर खत्री, २१ वर्षीया भागरथी खत्री, २ वर्षीया एलिसा खत्री र २५ वर्षीय हेमन्त प्रसाद भट्ट रहेका छन्। तीमध्ये गम्भीर अवस्थाका कमला धामी र राजेन्द्र खत्रीलाई थप उपचारका लागि डडेल्धुरा अस्पताल रिफर गरिएको छ।
दुर्घटनाको कारण हालसम्म स्पष्ट हुन सकेको छैन। प्रहरीले घटनाको थप अनुसन्धान गरिरहेको जनाएको छ।
प्रतिक्रिया