साफ यू–२० महिला च्याम्पियनसिप: नेपाल पहिलो खेलमा भुटानसँग भिड्दै

काठमाडौं । बंगलादेशको राजधानी ढाकामा आजदेखि सुरु हुने साफ यू–२० महिला च्याम्पियनसिप २०२५ मा नेपालले भुटानविरुद्ध खेल्दै प्रतियोगिताको अभियान सुरु गर्दैछ।

नेपाली समयअनुसार साँझ ६ः१५ बजे बसुन्धारा किङ्स एरेनामा हुने खेलमा नेपालको कप्तानी बिर्सना चौधरीले सम्हाल्नेछिन्। नेपाल र भुटानबीच यो दोस्रोपटक आमनेसामना हुन लागेको हो। दुई वर्षअघिको संस्करणमा पनि यी दुई टोली बंगलादेशमै भिडेका थिए, जहाँ नेपालले भुटानलाई ४–० को सानदार जित दिएको थियो।

प्रतियोगिता अन्तर्गत पहिलो दिनको पहिलो खेलमा दिउँसो ३ बजे आयोजक बंगलादेश र श्रीलंका आमने–सामने हुनेछन्।

च्याम्पियनसिपमा चार टोलीको सहभागिता

यस पटकको साफ यू–२० महिला च्याम्पियनसिपमा जम्मा चार टोली सहभागी छन् — आयोजक तथा गत संस्करणको विजेता बंगलादेश, नेपाल, भुटान र श्रीलङ्का। प्रतियोगिता जुलाई ११ देखि २१ तारिखसम्म सञ्चालन हुनेछ।

नेपालको टिममा युवा उत्साह र अनुभवको मिश्रण

कप्तान बिर्सना चौधरीसहित नेपाली टोलीमा अनुशासन, ऊर्जा र प्रतिभाले भरिएका युवा खेलाडीहरू छन्। टोलीमा रहेका अन्य खेलाडीहरू यस प्रकार छन्: लीला जोशी, करुणा बुढाथोकी, सुजाता तामाङ, सरिता कुमारी नाथ, माया मास्के, सेमिहाङ्मा लिम्बू पन्दाक, सिम्रन राई, झुमा विश्वकर्मा, गङ्गा रोकाया, अनिशा राई, सीता रोकाया, कविता गुरुङ, सुशीला केसी, अस्मिता गुरुङ, सेनु परियार, कुसुम खतिवडा, सुव्रिया मियाँ, मनीषा सेन, वर्षा ओली, पूर्णिमा राई, मीना देउवा र समीक्षा मगर।

नेपालले सुरुआती खेलमै सकारात्मक नतिजा निकाल्दै उपाधिको होडमा आफूलाई बलियो प्रतिस्पर्धीका रूपमा स्थापित गर्ने लक्ष्य लिएको छ।