काठमाडौं । साताको दोस्रो कारोबारी दिन सोमबार नेप्से परिसूचकमा दोहोरो अंकको गिरावट देखिएको छ।
नेप्से परिसूचक २२.३५ अंकले घटेर २६८४.०१ विन्दुमा झरेको छ। अघिल्लो दिन आइतबार परिसूचक सानो वृद्धिसहित २७ सय विन्दु नजिक पुगेको थियो। यस गिरावटसँगै बजारमा कुल सेयर कारोबार रकम पनि घटेको देखिन्छ। सोमबार ३११ वटा स्क्रिप्सका १ करोड ९४ लाख १५ हजार ६८८ कित्ता सेयर किनबेच भएका छन्, जसबाट ८ अर्ब ३७ करोड ७३ लाख २७ हजार १४७ रुपैयाँ बराबरको कारोबार भएको हो।
आइतबारको तुलनामा करिब १ अर्ब १३ करोडले कारोबार रकम घटेको हो। सोमबारको कारोबारमा कुनै पनि कम्पनीको सेयर मूल्य सकारात्मक सर्किट लेभलसम्म उक्लन सकेन। यद्यपि, माथिल्लो मैलुङ खोला जलविद्युत र कर्पोरेट डेभलपमेन्ट बैंकका सेयर मूल्यमा झण्डै ६ प्रतिशतको वृद्धि देखिएको छ।
त्यस्तै, राप्ति हाइड्रोपावर एण्ड जनरल कन्ट्रक्सनका लगानीकर्ताले सबैभन्दा धेरै घाटा व्यहोरेका छन्, सो कम्पनीको सेयर मूल्य १० प्रतिशतले घटेको छ। कारोबार रकमको आधारमा नेपाल रिइन्स्योरेन्स कम्पनी अग्रस्थानमा रह्यो, जसको कारोबार ८० करोड रुपैयाँभन्दा बढीमा सम्पन्न भयो। गार्डियन माइक्रो लाइफ इन्स्योरेन्सले ४१ करोडको, एनआरएन इन्फ्रास्टक्चर एण्ड डेभलपमेन्टले २४ करोडको, साहस उर्जाले २० करोडको र नगदी ग्रुपले १९ करोड रुपैयाँ बराबरको सेयर कारोबार गरे।
सोमबारको बजार विश्लेषण हेर्दा, कारोबारमा समावेश ३९ स्टकको मूल्य बढेको भए पनि २०९ स्टकको मूल्य घटेको छ। समग्रमा प्रायः समूहहरूमा गिरावट देखिएको छ भने फाइनान्स समूहको उपसूचकमा सबैभन्दा बढी, ३.७६ प्रतिशतको गिरावट आएको छ।
प्रतिक्रिया