एजेन्सी । फ्रेन्च क्लब पेरिस सेन्ट-जर्मेन (पीएसजी) फिफा क्लब विश्वकपको सेमिफाइनलमा प्रवेश गर्न सफल भएको छ।
जर्मन पावरहाउस बायर्न म्युनिखलाई २–० ले पराजित गर्दै पीएसजी अन्तिम चारमा पुग्न सफल भयो। पीएसजीको जितमा युवा खेलाडी डिजायर डो र अनुभवी विंगर ओस्मान डेम्बेलेले गोल गरे। खेलको ७८औं मिनेटमा डिजायरले उत्कृष्ट फिनिशमार्फत पहिलो गोल गर्दै टिमलाई अग्रता दिलाए भने इन्जुरी समयको छैटौं मिनेटमा डेम्बेलेले दोस्रो गोल थप्दै जित सुनिश्चित गरे।
रातो कार्डको तनाव, तर जितको उत्सव
खेलको उत्तरार्धमा पीएसजी ९ खेलाडीमा सीमित हुँदा पनि उत्कृष्ट बचाउ र आक्रमण प्रदर्शन गर्न सफल रह्यो। ८२औं मिनेटमा विलियन पाकोले रातो कार्ड पाउँदै मैदान छाडे भने, इन्जुरी समयको दोस्रो मिनेटमा लुकास हर्नान्डेजले पनि रातो कार्ड पाए। यति ठूलो दबाबका बीच पनि पीएसजीले थप एक गोल गर्दै बायर्नको आशा समाप्त गर्यो।
बायर्नका लागि अर्को झट्का : मुसियालाको चोट
पहिलो हाफको अन्त्यतिर बायर्न म्युनिखका उदीयमान स्टार जमाल मुसियाला गम्भीर रूपमा घाइते भए। प्रारम्भिक रिपोर्टअनुसार उनको खुट्टा भाँचिएको छ र उनी अब लामो समय मैदान बाहिर रहनेछन, जसले बायर्नको आगामी अभियानलाई ठूलो धक्का पुगेको छ।
अबको चुनौती : रियल मड्रिड
अब पीएसजीले सेमिफाइनलमा युरोपेली दिग्गज रियल मड्रिडसँग भिडन्त गर्नेछ। यो खेल विश्वभरका फुटबलप्रेमीहरूका लागि बहुप्रतीक्षित भिडन्त बन्ने पक्का छ।
प्रतिक्रिया