काठमाडौं । एसिसी मेन्स यू-१६ इस्ट जोन कप क्रिकेटको उपाधिका लागि नेपाल र सिंगापुरबीच रोमाञ्चक प्रतिस्पर्धा हुने भएको छ ।
दुबै टोलीले बिहीबार आफ्ना सेमिफाइनल खेल जित्दै शनिबार हुने फाइनल भिडन्तमा स्थान सुरक्षित गरेका हुन्। सिंगापुरले हङकङलाई ४ विकेटले हराउँदै उपाधि भिडन्तमा नेपालसँगको भेट पक्का गरेको हो। त्यस्तै, बिहीबार बिहान सम्पन्न सेमिफाइनलमा नेपालले घरेलु टोली मलेसियालाई ९ विकेटले पराजित गर्दै फाइनलमा प्रवेश गरेको थियो।
नेपाल र सिंगापुरबीचको फाइनल खेल मलेसियाको बांगी मैदानमा शनिबार हुनेछ। यसअघि समूह चरणमै यी दुई टोलीबीच प्रतिस्पर्धा भएको थियो, जसमा नेपालले सिंगापुरलाई ६ विकेटले सहजै पराजित गरेको थियो। सिंगापुरले प्रस्तुत गरेको १३९ रनको लक्ष्य नेपालले ४ विकेट गुमाएर ३३.३ ओभरमा पूरा गरेको थियो। त्यो खेलमा प्रसिद्ध जैशीले नटआउट रहँदै ५५ रनको अर्धशतकिय पारी खेलेका थिए, जसमा उनले ५ चौका प्रहार गरेका थिए।
पहिले ब्याटिङ गरेको सिंगापुर ३६.१ ओभरमा १३८ रनमै समेटिएको थियो। उक्त खेलमा नेपालका कप्तान विपिनप्रसाद शर्माले उत्कृष्ट प्रदर्शन गर्दै ४ विकेट लिएका थिए। समूह चरणमा नेपालले जापान, इन्डोनेसिया र भुटानलाई पराजित गर्दै सेमिफाइनल यात्रा तय गरेको थियो। लगातारको शानदार प्रदर्शनले नेपाललाई उपाधिका लागि बलियो दावेदार बनाएको छ।
शनिबारको फाइनलमा नेपाल सिंगापुरलाई फेरि पराजित गर्दै उपाधि उचाल्ने लक्ष्यमा हुनेछ।
प्रतिक्रिया