एजेन्सी । सात गोलको उत्कृष्ट रोमाञ्चपछिको संघर्षमा साउदी अरबको अल हिलालले इंग्लिस पावरहाउस म्यान्चेस्टर सिटीलाई अतिरिक्त समयमा ४-३ ले हराउँदै फिफा क्लब विश्वकपको क्वाटरफाइनलमा स्थान बनाएको छ।
मंगलबार बिहान सम्पन्न भएको यो खेलमा सिटीले सुरुवाती अग्रता बनाए पनि अल हिलालको सशक्त पुनरागमनले नतिजा उल्ट्यायो। नवौं मिनेटमा बर्नार्डो सिल्भाले गोल गर्दै सिटीलाई अगाडि ल्याए पनि दोस्रो हाफमा खेलको समीकरण बदलिन थाल्यो। दोस्रो हाफको सुरुवातमै मार्कस लियोनार्डोले हिलालका लागि बराबरी गोल गरे भने त्यसको केही मिनेटमै मालकोमले गोल थप्दै टोलीलाई अग्रता दिलाए।
तर सिटीका एर्लिङ हालान्डले तुरुन्तै बराबरी गोल गर्दै खेललाई प्रतिस्पर्धात्मक बनाए। ९० मिनेटमा खेल २-२ को बराबरीमा सकिएपछि अतिरिक्त समय खेलियो। ९३औं मिनेटमा कालिदोउ कुलिबाल्लीले गोल गर्दै हिलाललाई पुनः अग्रता दिलाए, जुन १०४औं मिनेटमा फिल फोडेनले बराबरीमा फर्काए।
तर ११२औं मिनेटमा लियोनार्डोले आफ्नो दोस्रो गोल गर्दै खेललाई ४-३ मा ल्याए र अन्ततः यही स्कोर निर्णायक बन्यो। यो जितसँगै एसिया प्रतिनिधि अल हिलालले युरोपेली दिग्गजलाई पराजित गर्दै क्लब विश्वकपको अन्तिम ८ मा स्थान बनाएको छ। अब सेमिफाइनल प्रवेशका लागि अल हिलालले ब्राजिलको फ्लुमिनेससँग प्रतिस्पर्धा गर्नेछ।
अल हिलालको यो जित एसियाली क्लबहरूका लागि प्रेरणादायक बनेको छ, जसले विश्व फुटबलमा उनीहरूको क्षमता पुनः पुष्टि गरेको छ।
प्रतिक्रिया