काठमाडौं । हाल नेपालभर मनसुनी वायुको प्रभाव सक्रिय रूपमा देखिएको छ।
मनसुनको न्यून चापीय रेखा औसत स्थानभन्दा उत्तरतर्फ सरेर पश्चिम नेपालको केही भाग नजिक पुगेको जल तथा मौसम विज्ञान विभागको मौसम पूर्वानुमान महाशाखाले जनाएको छ। हालको अवस्थाअनुसार बागमती, गण्डकी, लुम्बिनी, कर्णाली र सुदूरपश्चिम प्रदेशमा सामान्यतया बदली छ भने अन्य क्षेत्रहरूमा आंशिक बदली देखिएको छ।
सुदूरपश्चिम प्रदेशका तराई भू-भागमा केही स्थानमा मेघगर्जन र चट्याङसहित हल्कादेखि मध्यम वर्षा भइरहेको छ। यसैगरी, कोशी र कर्णाली प्रदेशका एक–दुई स्थानमा पनि हल्का वर्षा भइरहेको जानकारी प्राप्त भएको छ। देशभर सामान्य बदली रहनेछ। पहाडी भू-भागका धेरै स्थानहरूमा तथा अन्य भागका केही स्थानहरूमा मेघगर्जन र चट्याङसहित हल्कादेखि मध्यम वर्षा हुने सम्भावना छ।
कोशी, बागमती र गण्डकी प्रदेशका एक–दुई स्थानमा भारी वर्षाको चेतावनी दिइएको छ। उच्च पहाडी र हिमाली भू-भागका थोरै स्थानहरूमा हल्कादेखि मध्यम वर्षा र हिमपातको सम्भावना पनि रहेको छ। राति पनि मौसम सामान्यतया बदली रहनेछ। देशका पहाडी भागका केही स्थानमा तथा अन्य स्थानका थोरै क्षेत्रमा मेघगर्जनसहित हल्कादेखि मध्यम वर्षा हुन सक्नेछ।
कोशी प्रदेशमा एक–दुई स्थानमा भारी वर्षा सम्भावित छ। उच्च पहाडी तथा हिमाली भू-भागमा हल्कादेखि मध्यम वर्षा र हिमपातको सम्भावना यथावत् छ। कोशी, गण्डकी, लुम्बिनी, कर्णाली र सुदूरपश्चिम प्रदेश लगायतका पहाडी भू-भागमा व्यापक वर्षाको सम्भावना छ। साथै, कोशी, बागमती, गण्डकी र सुदूरपश्चिम प्रदेशका एक–दुई स्थानमा भारीदेखि अत्यधिक वर्षा हुन सक्ने भएकाले सतर्क रहन मौसम विभागले आग्रह गरेको छ।
उच्च वर्षा र हिमपातका कारण नदी तथा खोलामा पानीको बहाव बढ्ने, आकस्मिक बाढी, भू–क्षय र पहिरोजस्ता प्राकृतिक प्रकोप हुनसक्ने भएकाले जनस्वास्थ्य, कृषि, यातायात, तथा दैनिक जनजीवनमा पर्न सक्ने प्रभावलाई मध्यनजर गर्दै सावधानी अपनाउन अनुरोध गरिएको छ।
प्रतिक्रिया