फिफा क्लब विश्वकप: १० खेलाडीमा सीमित रियल मड्रिडको शानदार जित

काठमाडौं । फिफा क्लब विश्वकप फुटबल अन्तर्गत समूह ‘एच’को रोमाञ्चक खेलमा १० खेलाडीमा सीमित रियल मड्रिडले मेक्सिकन क्लब पाचुकामाथि ३–१ को सानदार जित निकालेको छ।

खेलको सुरुवातमै दबाबमा परेको रियल मड्रिडका राउल एसेन्सियोले सातौं मिनेटमा रातो कार्ड पाएपछि टोली १० खेलाडीमा झरेको थियो। यद्यपि, संख्यात्मक घाटीको बाबजुद रियलले उत्कृष्ट लय समाउँदै खेलमा नियन्त्रण कायम राख्यो। ३५औं मिनेटमा इंग्लिस युवा स्टार जुड बेलिङघमले पहिलो गोल गर्दै रियललाई अग्रता दिलाए। त्यसपछि ४३औं मिनेटमा आर्डा गुलरले अर्को गोल थप्दै पहिलो हाफमै रियललाई २–० को स्पष्ट अग्रता दिए।

दोस्रो हाफमा पनि रियलको दबाब कायमै रह्यो। ७०औं मिनेटमा फेडेरिको भाल्भेर्डेले तेस्रो गोल गर्दै जित सुनिश्चित गरे। पाचुकाका लागि एलियास मोंटियालले ८०औं मिनेटमा एक मात्र सान्त्वना गोल गरे। त्यसै समूहको अर्को खेलमा साउदी क्लब अल हिलाल र अष्ट्रियन क्लब साल्जबर्गबीच प्रतिस्पर्धात्मक खेल गोलरहित बराबरीमा सकियो।

यो नतिजासँगै समूह ‘एच’ थप रोमाञ्चक बनेको छ। दुई खेलपछि रियल मड्रिड र साल्जबर्ग दुवैको समान ४ अंक रहेको छ भने अल हिलाल २ अंकसहित तेस्रो स्थानमा छ। पाचुका भने लगातार हारपछि अंकविहीन रहँदै प्रतियोगिताबाट बाहिरिएको छ। अब समूह चरणको अन्तिम खेलमा रियल मड्रिड र साल्जबर्गबीचको भिडन्त समूह विजेता तय गर्ने निर्णायक हुने छ।

अल हिलालले भने पाचुकाविरुद्ध जित निकाल्दै अघिल्लो चरणमा स्थान बनाउनुपर्ने चुनौती सामना गर्दैछ।