काठमाडौं । स्कटल्याण्डमा जारी त्रिदेशीय टी–२० अन्तर्राष्ट्रिय क्रिकेट शृंखलाको अन्तिम खेलमा आज नेपाल र आयोजक स्कटल्याण्ड आमनेसामना हुँदैछन्।
खेल ग्लासग्लोस्थित मैदानमा नेपाली समय अनुसार बेलुका ७:४५ बजे सुरु हुनेछ। शृंखलामा हालसम्म नेपालले तीन खेलमध्ये दुईमा जित हात पार्दै सशक्त प्रदर्शन गरेको छ। स्कटल्याण्डले भने एकमात्र जित दर्ता गरेको छ। पहिलो खेलमा नेदरल्याण्ड्सलाई हराए पनि त्यसपछिका दुई खेलमा स्कटिश टोली नेपाल र नेदरल्याण्ड्ससँग पराजित भयो।
नेपालले भने पहिलो खेलमा नेदरल्याण्ड्ससँग सुपर ओभरमा पराजित भए पनि त्यसपछिका दुबै खेलमा शानदार पुनरागमन गर्दै स्कटल्याण्ड र नेदरल्याण्ड्सलाई पराजित गरेको हो। टी–२० फर्म्याटमा नेपाल र स्कटल्याण्डबीच अहिलेसम्म दुई पटकमात्र प्रतिस्पर्धा भएको छ, जसमा दुबै टोलीले एक/एक पटक जितेका छन्। टी–२०आई अन्तर्राष्ट्रिय मान्यतासहितको खेलमा भने नेपाल मंगलबार पहिलोपटक विजयी भएको थियो।
यसअघि लिग–२ अन्तर्गतको एकदिवसीय शृंखलामा पनि नेपालले स्कटल्याण्डविरुद्ध राम्रो प्रदर्शन गर्दै चारमध्ये तीन खेलमा जित निकालेको थियो।
अबको यो अन्तिम खेल जित्दै नेपालले टी–२०आई शृंखलालाई सफलतापूर्वक टुंग्याउने लक्ष्य राखेको छ।
प्रतिक्रिया