नेपाली बजारमा सुन तोलामा २ हजारले घट्यो

काठमाडौं । नेपाली बजारमा मंगलबार सुन र चाँदीको मूल्यमा गिरावट आएको छ।

लगातार उकालो लागेको सुनको मूल्यमा एकैदिन तोलामा २ हजार रुपैयाँले कमी आएको हो। नेपाल सुनचाँदी व्यवसायी महासंघका अनुसार मंगलबार छापावाल सुनको मूल्य प्रतितोला १ लाख ९५ हजार ५०० रुपैयाँ कायम गरिएको छ। यसअघि सोमबार यो मूल्य १ लाख ९७ हजार ५०० रुपैयाँ थियो।

सुनसँगै चाँदीको मूल्य पनि घटेको छ। सोमबार प्रतितोला १ हजार १६५ रुपैयाँ रहेको चाँदीको मूल्य मंगलबार घटेर १ हजार १६० रुपैयाँ मा झरेको छ। हालैका दिनहरूमा अन्तर्राष्ट्रिय बजारमा देखिएको उतारचढावको असर नेपाली बजारमा पनि देखिएको हो।

सुनचाँदी व्यवसायीहरूका अनुसार मूल्यमा थप परिवर्तन आउने सम्भावना रहन्छ, त्यसैले लगानीकर्ताहरूलाई सतर्कता अपनाउन सुझाइएको छ।