काठमाडौं । नेपाली क्रिकेटको इतिहासमा आज एक महत्वपूर्ण दिन रहेको छ।
नेपाली राष्ट्रिय पुरुष क्रिकेट टोलीले आफ्नो १००औं टी–२० अन्तर्राष्ट्रिय क्रिकेट खेल खेल्दैछ। स्कटल्यान्डमा जारी त्रिदेशीय टी–२० अन्तर्राष्ट्रिय शृङ्खलाअन्तर्गत नेदरल्यान्ड्सविरुद्धको खेल नेपाली क्रिकेटको यो ऐतिहासिक उपलब्धि बन्न लागेको हो। नेपालले अन्तर्राष्ट्रिय टी–२० क्रिकेटको यात्रा सन् २०१४ मा हङकङविरुद्ध खेलेको खेलबाट सुरू गरेको थियो, जसमा नेपाल विजयी भएको थियो।
त्यसयता नेपालले ९९ वटा टी–२० अन्तर्राष्ट्रिय खेल खेल्दा ५५ खेलमा जित हासिल गरेको छ। ३९ खेलमा हार बेहोरेको छ भने २ खेल बराबरीमा र ३ खेल नतिजाविहीन भएका छन्। टीमका नियमित सदस्यहरू सोमपाल कामी, करण केसी र दीपेन्द्रसिंह ऐरीले हालसम्म सर्वाधिक ७८ खेल खेलिसकेका छन्।
तीमध्ये सोमपालले नेपालको पहिलो टी–२० अन्तर्राष्ट्रिय खेलमै सहभागीता जनाएका थिए, तर हालै चोटका कारण उनी यो शृङ्खलाबाट बाहिर छन्। नेपालका लागि अहिलेसम्म कुल ४९ खेलाडीले टी–२० अन्तर्राष्ट्रिय क्रिकेट खेलिसकेका छन्। पछिल्लो खेलाडीको रूपमा नन्दन यादवले हालै नेपालबाट डेब्यु गरेका थिए।
आजको खेल बेलुकी पौने ८ बजे सुरु हुने तालिका रहेको छ। शृङ्खलाको पहिलो खेलमा स्कटल्यान्डले नेदरल्यान्ड्सलाई हराएको थियो। अब नेपाल आफ्नो सयौं खेलमा विजय हासिल गर्दै यो ऐतिहासिक दिनलाई स्मरणीय बनाउन चाहन्छ।
प्रतिक्रिया