शुक्रबारको मौसमः कहाँ-कहाँ छ बर्षाको सम्भावना ?

काठमाडौं । हाल देशको पश्चिमी तथा मध्य भू-भागमा पश्चिमी वायु र स्थानीय वायु सक्रिय छन् भने कोशी प्रदेशका अधिकांश स्थानमा मनसुनी वायुको प्रभाव देखिएको छ।

जल तथा मौसम विज्ञान विभागको मौसम पूर्वानुमान महाशाखाका अनुसार कोशी र सुदूरपश्चिम प्रदेशसहित देशका पहाडी क्षेत्रमा आंशिक बदली देखिनेछ। अन्य क्षेत्रहरूमा मौसम प्रायः सफा रहने अनुमान गरिएको छ।

दिउँसो कोशी र लुम्बिनी प्रदेशसँगै देशका पहाडी भागहरूमा आंशिकदेखि सामान्य बदली रहनेछ। त्यस्तै, कोशी प्रदेश र आसपासका पहाडी क्षेत्रका केही स्थानहरूमा मेघगर्जन र चट्याङसहित हल्कादेखि मध्यम वर्षा हुने सम्भावना छ। साथै, देशका उच्च पहाडी तथा हिमाली भेगका एक-दुई स्थानमा हल्का वर्षा वा हिमपातको संकेत छ।

रातिको समयभरि देशभर आंशिकदेखि सामान्य बदली रहनेछ। देशका थोरै स्थानहरूमा चट्याङसहित हल्कादेखि मध्यम वर्षा र उच्च भू-भागमा हिमपातको सम्भावना कायम रहनेछ।

महाशाखाले सम्भावित मौसम अवस्थाका कारण दैनिक जनजीवन, कृषि कार्य, स्वास्थ्य सेवा, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन आम नागरिकलाई आग्रह गरेको छ।