काठमाडौं । अहिले देशको पश्चिमी र मध्य भू–भागमा पश्चिमी र स्थानीय वायुको प्रभाव देखिएको छ भने कोशी प्रदेशका अधिकांश स्थानमा मनसुनी वायु सक्रिय रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।
आज दिउँसो कोशी र लुम्बिनी प्रदेशसहित देशका पहाडी क्षेत्रहरूमा आंशिकदेखि सामान्य बदली रहनेछ भने अन्य भू–भागमा मौसम मुख्यतः सफा देखिनेछ। कोशी प्रदेशका केही स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ। साथै, उच्च पहाडी र हिमाली भू–भागमा एक–दुई स्थानमा हल्का वर्षा र हिमपात पनि हुन सक्ने अनुमान गरिएको छ।
रातिको समय पनि उस्तै रहनेछ। कोशी, लुम्बिनी र सुदूरपश्चिम प्रदेशसहित पहाडी क्षेत्रमा आंशिकदेखि सामान्य बदली रहनेछ भने अन्य भागमा आंशिक बदली रहनेछ। यी क्षेत्रका केही स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना यथावत् रहेको छ। साथै, गण्डकी र कर्णाली प्रदेशका हिमाली भू–भागमा पनि हल्का वर्षा र हिमपात हुन सक्नेछ।
मौसमको यो परिवर्तनले दैनिक जनजीवन, कृषि, स्वास्थ्य, सडक तथा हवाई यातायातमा असर पुर्याउने सम्भावना रहेको हुँदा आवश्यक सतर्कता अपनाउन मौसम पूर्वानुमान महाशाखाले सबैलाई अनुरोध गरेको छ।
प्रतिक्रिया