काठमाडौं । आइसीसी एकदिवसीय क्रिकेट विश्वकप लिग–२ अन्तर्गत आजको खेलमा आयोजक स्कटल्याण्ड र नेदरल्याण्ड्स आमनेसामने हुँदैछन्।
यो प्रतिस्पर्धा नेपाली समय अनुसार दिउँसो ३ः४५ बजे सुरु हुनेछ। दुवै टोली नेपालसँग पराजित हुँदै सिरिजको पहिलो खेलमा हार बेहोरेका छन् र आज जित निकाल्दै पुनरागमन गर्ने प्रयासमा छन्। नेपालले स्कटल्याण्डलाई पहिलो खेलमा रोमाञ्चक एक विकेटले हराएको थियो भने दोस्रो खेलमा नेदरल्याण्ड्सलाई ५ विकेटले पराजित गरेको थियो।
हेड टु हेड तथ्यांक हेर्दा स्कटल्याण्ड र नेदरल्याण्ड्सबीच हालसम्म १४ ओडीआई खेल भइसकेका छन्। स्कटल्याण्डले ८ खेल जितेको छ भने नेदरल्याण्ड्सले ५ खेलमा विजयी हासिल गरेको छ। १ खेल नतिजाविहीन भएको छ। विश्वप लिग २ को अंक तालिकाको स्थिति हेर्दा नेदरल्याण्ड्स २१ खेलमा २६ अंकसहित दोस्रो स्थानमा। स्कटल्याण्ड १७ खेलमा २० अंकसहित चौथो स्थानमा। नेपाल १४ खेलमा १० अंकसहित सातौं स्थानमा रहेको छ ।
नेपालले पछिल्ला दुई खेलमा लगातार जित हासिल गर्दै सुधारको संकेत देखाएको छ । आजको खेल दुवै टोलिका लागि मनोवैज्ञानिक र अंकगत दृष्टिकोणले निकै महत्त्वपूर्ण हुनेछ।
प्रतिक्रिया