काठमाडौं । आइसिसी विश्वकप लिग-२ अन्तर्गत जारी त्रिकोणात्मक सिरिजमा नेपालले आज दोस्रो खेल खेल्दैछ।
स्कटल्यान्डको डन्डीमा हुने यो खेल नेपाली समय अनुसार आज बुधबार दिउँसो ३:४५ बजे सुरु हुनेछ। नेदरल्यान्ड्सले टस जितेर पहिले ब्याटिङ गर्ने निर्णय गरेको छ। नेपालले आजको खेलका लागि प्लेइङ-११ मा एक खेलाडी परिवर्तन गरेको छ। पहिलो खेलमा स्कटल्यान्डविरुद्ध खेलाएका तीव्र गतिका बलर रिजन ढकालको स्थानमा स्पिनर ललितनारायण राजवंशीलाई मौका दिइएको छ।
नेपालको आजको प्लेइङ-११:
कुशल भुर्तेल, आसिफ शेख (विकेटकिपर), भीम सार्की, रोहितकुमार पौडेल (कप्तान), आरिफ शेख, दीपेन्द्रसिंह ऐरी, गुल्सन झा, सोमपाल कामी, करण केसी, सन्दीप लामिछाने, ललितनारायण राजवंशी।
नेपालले यसअघि सिरिजको पहिलो खेलमा घरेलु टोली स्कटल्यान्डलाई एक विकेटले हराउँदै रोमाञ्चक जित हात पारेको थियो। एकदिवसीय क्रिकेटमा नेपाल र नेदरल्यान्ड्सबीच हालसम्म पाँच पटक प्रतिस्पर्धा भएको छ। तीमध्ये नेदरल्यान्ड्सले तीन खेल जितेको छ भने नेपालले दुई खेलमा जित दर्ता गरेको छ।
नेपाल आजको खेलमा जित निकाल्दै सिरिजमा बलियो स्थितिमा पुग्ने लक्ष्यमा हुनेछ।
प्रतिक्रिया