एजेन्सी । दक्षिण अफ्रिकी क्रिकेट टोलीका उत्कृष्ट विकेटकिपर–ब्याट्सम्यान हेनरिच क्लासेनले ३३ वर्षको उमेरमा अन्तर्राष्ट्रिय क्रिकेटबाट सन्यास लिने घोषणा गरेका छन्।
उनको यस निर्णयले क्रिकेटप्रेमीहरूलाई स्तब्ध बनाएको छ। सन् २०१८ मा दक्षिण अफ्रिकाको राष्ट्रिय टोलीबाट अन्तर्राष्ट्रिय यात्रा सुरु गरेका क्लासेन सीमित ओभरको क्रिकेटमा आक्रामक ब्याटिङ र उत्कृष्ट विकेटकिपिङका लागि विशेष परिचित थिए। सन् २०२४ मा टेस्ट क्रिकेटबाट विदा लिएका उनले अब एकदिवसीय र टी–२० फर्म्याटबाट पनि टाढिने निर्णय गरेका छन्।
‘देशका लागि खेलेका ती हरेक पलहरू मेरो लागि गर्वका क्षणहरू हुन्’, क्लासेनले एक भावनात्मक विज्ञप्तिमा भनेका छन्। उनले अब आफ्नो समय परिवारसँग बिताउने र फ्रेन्चाइज क्रिकेट तथा अन्य व्यक्तिगत योजनाहरूमा केन्द्रित हुने जनाएका छन्। उनको अन्तर्राष्ट्रिय यात्राको आँकडाले पनि उनको योगदान प्रमाणित गर्छ—८५ एकदिवसीय खेलमा ३,२११ रन र ५४ टी–२० खेलमा १,१५७ रन।
आक्रामक शैलीका कारण उनी विश्वभरका टी–२० लिगहरूमा निकै लोकप्रिय थिए। विशेषगरी, घरेलु क्रिकेट र अन्तर्राष्ट्रिय फ्रेन्चाइज लिगमा उनले देखाएको निरन्तर प्रदर्शन प्रशंसनीय रह्यो। दक्षिण अफ्रिकी क्रिकेट बोर्डले क्लासेनको योगदानको कदर गर्दै भविष्यका लागि शुभकामना व्यक्त गरेको छ। क्रिकेट विशेषज्ञहरूले उनको सन्न्यासलाई सीमित ओभरको क्रिकेटमा ठूलो क्षति भनेका छन्।
उनको अन्तिम अन्तर्राष्ट्रिय खेल गत महिना सम्पन्न भएको थियो। त्यसपछि आएको यो सन्न्यासको घोषणा क्लासेनका लागि भावुक विदाइ बन्यो। अब उनको ध्यान पूर्ण रूपमा विश्वका विभिन्न टी–२० लिगहरूमा केन्द्रित हुने अपेक्षा गरिएको छ।
प्रतिक्रिया