एकदिवसीय क्रिकेटबाट ग्लेन म्याक्सवेलको सन्यास घोषणा

काठमाडौं । अस्ट्रेलियाका बहुआयामिक खेलाडी ग्लेन म्याक्सवेलले एकदिवसीय अन्तर्राष्ट्रिय क्रिकेटबाट सन्न्यास लिने घोषणा गरेका छन्।

क्रिकेट अस्ट्रेलियाका अनुसार, म्याक्सवेलले आगामी सन् २०२६ मा भारत र श्रीलङ्कामा आयोजना हुने टी–२० विश्वकपमा केन्द्रित रहन यो निर्णय गरेका हुन्। ३६ वर्षका म्याक्सवेलले सन् २०२१ देखि २०२५ सम्म एकदिवसीय क्रिकेटमा कुल १४९ खेल खेलेका छन्। यस अवधिमा उनले ३३.८१ को औसत र १२६.७० को स्ट्राइक रेटसहित ३,९९० रन बनाए भने ७७ विकेट पनि लिए। उनका नाममा चार शतक र २३ अर्धशतक पनि छन्।

म्याक्सवेल अस्ट्रेलियाको सन् २०१५ र २०२३ को एकदिवसीय विश्वकप विजेता टोलीका महत्वपूर्ण सदस्य थिए। विशेषगरी सन् २०२३ को विश्वकपमा अफगानिस्तानविरुद्ध उनले अविजित २०१ रन बनाएर एकदिवसीय क्रिकेटमा आफ्नो उत्कृष्ट क्षमताको परिचय दिएका थिए।

उनको यो निर्णयले अस्ट्रेलियाली क्रिकेटमा नयाँ युगको संकेत गरेको छ, जहाँ उनी टी–२० विश्वकपमा आफूलाई समर्पित गर्दै खेलको अर्को अध्यायमा प्रवेश गर्दैछन्।