डोटी । केआईसिंह गाउँपालिका–५ केदार गाउँमा जीप दुर्घटना हुँदा एक जनाको मृत्यु भएको छ भने अन्य आठ जना घाइते भएका छन्।
जिल्ला प्रहरी कार्यालय डोटीका सूचना अधिकारी दीपेन्द्रकुमार पालका अनुसार, आज बिहान सुपप्र ०१–००१ ज १४६४ नम्बरको जीप बोगटान फुड्सिलको गगुडाबाट दिपायलतर्फ जाँदै गर्दा दुर्घटनामा परेको हो। सो दुर्घटनामा बोगटान फुड्सिल गाउँपालिका–६ का ४२ वर्षीय मीन बमको ज्यान गएको प्रहरीले जनाएको छ।
गम्भीर घाइते अवस्थामा शैलेश्वरी अस्पताल दिपायल पुर्याइएका बमलाई चिकित्सकले मृत घोषित गरेका थिए। प्रहरीका अनुसार, दुर्घटनामा परेका जीप चालकसहित अन्य आठ जना घाइते भएका छन्। तीमध्ये एक जनाको अवस्था गम्भीर, पाँच जनाको अवस्था मध्यम र दुई जनाको अवस्था सामान्य रहेको छ। सबै घाइतेहरूको शैलेश्वरी अस्पताल दिपायलमा उपचार भइरहेको छ।
दुर्घटनाको कारण खुल्न बाँकी रहेको र थप अनुसन्धान भइरहेको प्रहरीले जनाएको छ।
प्रतिक्रिया