एसईई अब प्रदेश सरकारको जिम्मामा

काठमाडौं । सरकारले माध्यमिक शिक्षा परीक्षा (एसईई) आगामी आर्थिक वर्षदेखि प्रदेश सरकारले सञ्चालन गर्ने व्यवस्था लागू गर्ने घोषणा गरेको छ।

बिहीबार संघीय संसदमा बजेट प्रस्तुत गर्दै उपप्रधान तथा अर्थमन्त्री विष्णुप्रसाद पौडेलले २०८२/८३ को बजेटमार्फत एसईई परीक्षा अब प्रदेशबाट सञ्चालन गरिने जानकारी दिए। हालसम्म एसईई राष्ट्रिय परीक्षा बोर्डको व्यवस्थापनमा हुँदै आएको थियो, जसमा प्रश्नपत्र निर्माणदेखि नतिजा प्रकाशनसम्मको कार्य बोर्डले सम्हाल्दै आएको थियो। अब प्रदेश सरकारले सम्पूर्ण प्रक्रिया सञ्चालन गर्ने जिम्मेवारी पाउनेछ।

राष्ट्रिय परीक्षा बोर्डले २०७८ सालमै नियमावली संशोधन गर्दै प्रदेशलाई परीक्षा सञ्चालनको अधिकार दिएको भए पनि पूर्ण कार्यान्वयन हुन सकेको थिएन। सरकारले अब बजेटीय नीतिमार्फत यसलाई कार्यान्वयनमा ल्याउने घोषणा गरेको हो।