आईपीएल २०२५ः हैदराबादसँगको हारसँगै लखनउको प्लेअफ यात्रा टुंगियो

काठमाडौं । सोमबारको खेलमा सनराइजर्स हैदराबादसँग ६ विकेटले पराजित भएपछि लखनउ सुपर जायन्ट्सको आईपीएल २०२५ को प्लेअफ यात्रा समाप्त भएको छ।

पहिले नै प्लेअफ दौडबाट बाहिरिसकेको हैदराबादले २०६ रनको चुनौतीलाई १८.२ ओभरमै ४ विकेट गुमाएर सहज रूपमा पूरा गर्‍यो। हैदराबादका ओपनर अभिषेक शर्माले आक्रामक ब्याटिङ गर्दै २० बलमा ४ चौका र ६ छक्कासहित ५९ रन बनाए। हेनरिच क्लासेनले ४७, इशान किशनले ३५ रन तथा कामिन्दु मेन्डिसले अविजित ३२ रन बनाए। लखनउका लागि दिग्वेश राथीले २ र विलियम ओरोर्कले १ विकेट लिए।

त्यसअघि टस हारेर पहिले ब्याटिङ गरेको लखनउले निर्धारित २० ओभरमा ७ विकेट गुमाउँदै २०५ रन बनाएको थियो। ओपनर मिचल मार्शले ६५ रन र एइडेन मार्करमले ६१ रनको योगदान दिए। निकोलस पूरनले पनि आक्रामक ४५ रन जोडे। यो नतिजासँगै हैदराबादले १३ खेलमा ९ अंक बनाउँदै आठौं स्थानमा रहँदा, लखनउ १२ खेलबाट १० अंकसहित सातौं स्थानमा सीमित रहँदै प्लेअफको दौडबाट बाहिरिएको छ।

अब बाँकी खेलहरूमा मुम्बई इन्डियन्स र दिल्ली क्यापिटल्समध्ये कुनै एक टोलीले अन्तिम प्लेअफ स्थान सुरक्षित गर्नेछ।