पेनाल्टीमा बङ्गलादेशलाई हराउँदै भारतले जित्यो १९ वर्षमुनिको साफ उपाधि

एजेन्सी । १९ वर्षमुनिको साफ च्याम्पियनशिपको उपाधि घरेलु टोली भारतले जितेको छ।

फाइनल खेलमा भारतले साबिक विजेता बङ्गलादेशलाई पेनाल्टी सुटआउटमा ४–३ गोलले पराजित गर्दै च्याम्पियन बनेको हो। अरुणाञ्चलको गोल्डेन जुब्ली रङ्गशालामा गएराति सम्पन्न रोमाञ्चक फाइनल खेलमा दुवै टोलीले निर्धारित समयसम्म १–१ को बराबरी खेलेपछि खेलको निर्णय पेनाल्टीमार्फत गरिएको थियो।

यसअघिको सेमिफाइनल चरणमा भारतले माल्दिभ्सलाई ३–० ले हराएको थियो भने बङ्गलादेशले नेपाललाई २–१ ले पराजित गर्दै फाइनल यात्रा तय गरेको थियो। भारतका लागि यो उपाधि चौथो पटकको हो।

यसअघि भारतले सन् २०१९ मा १८ वर्षमुनिको, २०२२ मा २० वर्षमुनिको र २०२३ मा १९ वर्षमुनिको च्याम्पियनशिप जितिसकेको छ।