खुर्पा प्रहार गरि बुबाद्वारा छोरी र भतिजाको हत्या

चितवन । चितवनको भरतपुर महानगरपालिका–२५ स्थित शुक्रनगरमा एक दर्दनाक पारिवारिक घटना घटेको छ।

४२ वर्षीय लिलाराज गिरीले आफ्नै परिवारका दुई बालबालिकाको हत्या गरेका छन्। लिलाराजले आफ्नी छोरी प्रभा गिरी र दाजु दया गिरीका अन्दाजी ७ वर्षीय छोरा सजन गिरीलाई धारिलो हतियार (खुर्पा) प्रयोग गरी आक्रमण गरेका थिए। गम्भीर घाइते भएका दुवै बालबालिकाको चितवन मेडिकल कलेजमा उपचारका क्रममा आज बिहान मृत्यु भएको प्रहरीले जानकारी दिएको छ।

आक्रोशित अवस्थाका लिलाराजले घटनापछि आफैंको घाँटी पनि रेटेर आत्महत्या प्रयास गरेका थिए। हाल उनको अवस्था गम्भीर रहेको र भरतपुरस्थित अस्पतालमा उपचार भइरहेको छ।

उक्त घटनाको वास्तविक कारण अझै स्पष्ट भएको छैन। चितवन प्रहरीले विस्तृत अनुसन्धान अघि बढाएको जनाएको छ।