चार वायुको प्रभाव कायमै, वर्षा र हिमपातको सम्भावना

काठमाडौं । देशभरको मौसममा हाल पश्चिमी वायु, स्थानीय वायु तथा बङ्गालको खाडी र अरब सागरबाट भित्रिएको जलवाष्पयुक्त हावाको संयुक्त प्रभाव देखिएको मौसम पूर्वानुमान महाशाखाले जनाएको छ।

यस प्रणालीको कारण कर्णाली र सुदूरपश्चिम प्रदेशलगायतका पहाडी क्षेत्रहरूमा आंशिकदेखि सामान्य बदलीको अवस्था रहेको छ भने देशका अन्य भागहरूमा मौसम सामान्यतया सफा छ। गण्डकी, लुम्बिनी, कर्णाली र सुदूरपश्चिम प्रदेशका केही पहाडी स्थानमा अहिले हल्का वर्षा भइरहेको छ, कतिपय स्थानमा चट्याङ्ग पनि परेको जानकारी प्राप्त भएको छ।

आज दिउँसो पहाडी भूभागमा आंशिकदेखि सामान्य बदली रहनेछ भने अन्य स्थानमा मौसम सफा रहने सम्भावना रहेको छ। देशका पहाडी भेगका केही स्थान र अन्य क्षेत्रका एक–दुई स्थानमा चट्याङ्गसहित हल्कादेखि मध्यम वर्षाको सम्भावना छ। साथै, हिमाली क्षेत्रका एक वा दुई स्थानमा वर्षासँगै हिमपात पनि हुन सक्ने महाशाखाले जनाएको छ।

आज राति पनि पहाडी भूभागमा चट्याङ्गसहित हल्कादेखि मध्यम वर्षा र हिमाली क्षेत्रमा हल्का वर्षासहित हिमपातको सम्भावना रहेकोले सतर्कता अपनाउन महाशाखाको आग्रह छ। मौसमको यस्तो अवस्थाले दैनिक जनजीवनसँगै कृषि, स्वास्थ्य, सडक तथा हवाई यातायातमा असर पुर्‍याउन सक्ने भएकाले सर्वसाधारणलाई आवश्यक सावधानी अपनाउन सुझाव दिइएको छ।